మహిళా భద్రత: శక్తి యాప్‌కు 1.55 కోట్ల డౌన్‌లోడ్‌లు, ప్రత్యేక IG నియామకం — హోంమంత్రి అనిత

రాష్ట్రంలో మహిళా భద్రతకు అత్యంత ప్రాధాన్యత ఇస్తున్నట్లు హోంమంత్రి అనిత తెలిపారు. ఈ మేరకు ‘శక్తి’ యాప్‌కు ప్రత్యేక వింగ్‌ను ఏర్పాటు చేశామని, ఐజీ స్థాయి అధికారిణి రాజకుమారిని నియమించామని విలేకరుల సమావేశంలో ప్రకటించారు.

శక్తి యాప్‌లో 16 రకాల ఫీచర్లు ఉన్నాయని, ఇప్పటివరకు సుమారు 1.55 కోట్ల మంది యాప్‌ను డౌన్‌లోడ్ చేసుకున్నారని వివరించారు. అత్యవసర సమయాల్లో నేరుగా సందేశం లేదా వీడియో పంపేందుకు ‘శక్తి వాట్సప్’ నంబర్‌గా 75534851ను కేటాయించినట్లు చెప్పారు. 100 నెంబర్ ద్వారా 11,13,000 కాల్స్, 112 ద్వారా 1,26,600 అత్యవసర కాల్స్ వచ్చాయని గణాంకాలు ఇచ్చారు.

తప్పిపోయిన లేదా కిడ్నాప్‌కు గురైన బాలలు, వృద్ధులను గుర్తించే ‘ఆపరేషన్ ట్రేస్’ ద్వారా 8,396 మందిని కనుగొన్నామని, వారిని కుటుంబాల వద్దకు చేర్చామని తెలిపారు. పోక్సో కేసుల పట్ల జీరో టాలరెన్స్ విధానం అవలంభిస్తున్నామని, ఇటీవల ఓ ఘటనలో నిందితుడు పోలీసుల ఒత్తిడితో ఆత్మహత్య చేసుకున్నాడని హోంమంత్రి పేర్కొన్నారు.

మహిళా, శిశు రక్షణ కోసం ప్రత్యేక టాస్క్‌ఫోర్స్ పనిచేస్తోందని, ఇలాంటి నేరాలపై కఠిన చర్యలు కొనసాగుతాయని అనిత స్పష్టం చేశారు.