సింగరాయకొండ బీటెక్ విద్యార్థి మృతి: 15 రోజులుగా మృతదేహం లేదు, అప్పగించాలని కుటుంబం డిమాండ్

ప్రకాశం జిల్లా సింగరాయకొండకు చెందిన బీటెక్ విద్యార్థి అంకం రాహుల్ అనుమానాస్పద స్థితిలో మృతి చెంది 15 రోజులు గడిచింది. ఈ నేపథ్యంలో రాహుల్ తల్లిదండ్రులు అంకం రాజేశ్వర్, వనిత ఆంధ్రప్రదేశ్ ప్రభుత్వాన్ని ఆశ్రయించి, మృతదేహాన్ని వెంటనే తమకు అప్పగించాలని కోరారు.

హైదరాబాద్‌లోని బషీర్‌బాగ్ ప్లస్ క్లబ్‌లో బీసీ రాజ్యాధికార సమితి (BCRS) అధ్యక్షుడు దాసు సురేష్‌తో కలిసి మీడియా సమావేశం నిర్వహించిన రాహుల్ కుటుంబం, పోలీసులు డీఎన్ఏ పరీక్షల పేరుతో కాలయాపన చేస్తున్నారని ఆవేదన వ్యక్తం చేసింది. తమ కుమారుడిని హత్య చేసి, ఆత్మహత్యగా చిత్రీకరిస్తున్నారని ఆరోపించింది.

దాసు సురేష్ మాట్లాడుతూ, “భారతీయ పౌరుడు విదేశాల్లో చనిపోతే ఒకటి రెండు రోజుల్లో మృతదేహం ఇక్కడికి చేరుతుంది. కానీ పొరుగు రాష్ట్రంలో ఉన్న రాహుల్ మృతదేహాన్ని 15 రోజులైనా తీసుకురాలేకపోవడం విద్య, హోం శాఖల వైఫల్యం” అని అన్నారు. రాహుల్ కుటుంబానికి న్యాయం జరిగేంత వరకు తాము అండగా ఉంటామని హామీ ఇచ్చారు.

తల్లిదండ్రులు తెలిపిన వివరాల ప్రకారం, రాహుల్‌ను చదువు కోసం హైదరాబాద్ పంపించగా, అక్కడ ఇంటర్న్‌షిప్ నెపంతో ర్యాగింగ్ చేసి, కాన్ఫరెన్స్ కాల్స్ ద్వారా తీవ్రంగా వేధించారు. ఈ వేధింపుల ఆడియో, వీడియో తమ వద్ద ఉన్నాయని, అలాగే కాల్ డేటా కూడా తమకు కావాలని వారు కోరారు. “మాకు తొందరగా బాడీ ఇస్తే, ఆ రోజు చూసి ఏడ్చి ఊరట పొందుతాం” అని రాహుల్ తల్లి కన్నీటి పర్యంతమయ్యారు.

ఈ విషయంపై పోలీసుల స్పందన, ఆంధ్రప్రదేశ్ ప్రభుత్వం తరఫున అధికార ప్రతిస్పందన ఇంకా రాలేదు. కుటుంబం చేసిన ఆరోపణలపై విచారణ ఎప్పుడు మొదలవుతుందనేది చూడాలి.