తమిళనాడు BJP నేత అన్నామలై నుంచి రాజీనామా ప్రతిపాదన; ఢిల్లీలో అధిష్టానంతో చర్చలు

తమిళనాడు బీజేపీ మాజీ అధ్యక్షుడు అన్నామలై బీజేపీకి రాజీనామా చేయాలనే ప్రతిపాదనతో ఢిల్లీలో పార్టీ కేంద్ర నాయకత్వంతో సమావేశమయ్యారు. మంగళవారం బీజేపీ జాతీయ అధ్యక్షుడు జేపీ నడ్డా, కేంద్ర హోంమంత్రి అమిత్ షా, సంస్థాగత వ్యవహారాల కార్యదర్శి బీఎల్ సంతోష్‌తో ఆయన భేటీ అయ్యారు.

ఈ సందర్భంగా తాను పార్టీని వీడాలనుకుంటున్నట్లు అన్నామలై వెల్లడించినట్లు సమాచారం. తన నిర్ణయాన్ని స్పష్టం చేస్తూ ఐదు పేజీల లేఖను కూడా అందించారని ఆయన సన్నిహిత వర్గాల ద్వారా తెలుస్తోంది. అయితే కొద్ది రోజులు ఓపిక పట్టాలని, అంశాన్ని అధ్యయనం చేయాలని బీజేపీ పెద్దలు కోరినట్లు ఆ వర్గాలు తెలిపాయి.

బీజేపీలో తనకు రాజకీయ భవిష్యత్తు లేదని భావించిన అన్నామలై, సొంత పార్టీని స్థాపించి ఉప ఎన్నికల్లో పోటీ చేయాలనే యోచనలో ఉన్నారని, ఇప్పటికే ‘వీధి లీడర్స్’ అనే ఎన్జీఓను నడుపుతున్నారని వర్గాల సమాచారం. బీజేపీ రాజ్యసభ సీటు ఆఫర్ చేసినా ఆయన తిరస్కరించినట్లు తెలుస్తోంది. పార్టీ నేతలు మాత్రం ఆయనను ఒప్పించే ప్రయత్నంలో ఉన్నారు.

ప్రస్తుతం ఢిల్లీలోనే ఉన్న అన్నామలై, బుధవారం కూడా అక్కడే ఉండనున్నారు. తమిళనాడుకు తిరిగి వచ్చిన తర్వాత జూన్ 3 లేదా 4 తేదీల్లో తన భవిష్యత్తు ప్రకటన చేసే అవకాశం ఉందని, కానీ ఇప్పటివరకు అధికారిక ప్రకటన ఏమీ రాలేదని సన్నిహిత వర్గాలు పేర్కొన్నాయి.