బీజేపీకి ఝలక్: తమిళనాడులో సొంత పార్టీ పెడుతున్న అన్నామలై, మధ్యాహ్నం ప్రకటన

తమిళనాడు బీజేపీ మాజీ అధ్యక్షుడు కె. అన్నామలై భారతీయ జనతా పార్టీకి రాజీనామా చేసి సొంత పార్టీని స్థాపించాలని నిర్ణయించుకున్నట్లు ఆయన సన్నిహిత వర్గాలు తెలిపాయి. ఈ మేరకు ఇవాళ మధ్యాహ్నం 12 గంటలకు ఆయన అధికారిక ప్రకటన చేయనున్నారు.

2024 లోక్‌సభ ఎన్నికల తర్వాత తమిళనాడులో బీజేపీ ఓట్ల శాతాన్ని డబుల్ డిజిట్‌కు తీసుకెళ్లేందుకు అన్నామలై తీవ్రంగా శ్రమించారు. అయితే, 2025 చివర్లో అన్నాడీఎంకే మళ్లీ ఎన్డీఏ కూటమిలోకి రావడంతో పార్టీలో ఆయన పాత్ర క్రమంగా తగ్గించబడిందని, నిర్ణయాలు అన్నాడీఎంకేకే వదిలేయడం జరిగిందని అన్నామలై వర్గాలు ఆరోపిస్తున్నాయి.

దీంతో అసంతృప్తితో ఉన్న అన్నామలై, తనను నిలబెట్టుకునేందుకు బీజేపీ అధిష్టానం చేసిన ప్రయత్నాలను కూడా పట్టించుకోలేదు. రాజ్యసభ సీటు ఆఫర్ వంటి ప్రతిపాదనలను సైతం ఆయన తిరస్కరించినట్లు తెలిసింది. ప్రస్తుతం ఢిల్లీలో ఉన్న అన్నామలై, అక్కడి నుంచి నేరుగా సామాజిక మాధ్యమాల ద్వారా ప్రజలతో చర్చించిన తర్వాత తన నిర్ణయాన్ని ప్రకటించనున్నారు.

అన్నామలై బీజేపీని వీడటం తమిళనాడు రాజకీయాల్లో పెను ప్రకంపనలు సృష్టించనుంది. బీజేపీ జాతీయ నాయకత్వానికి ఇది పెద్ద ఎదురుదెబ్బగా భావిస్తున్నారు. మాజీ ఐపీఎస్ అధికారి అయిన అన్నామలై, తన దూకుడైన శైలితో తమిళనాడులో బీజేపీకి గుర్తింపు తెచ్చిన నేతగా పేరొందారు. ఆయన సొంత పార్టీ పెడితే, వచ్చే అసెంబ్లీ ఎన్నికల్లో బీజేపీ ఓటు బ్యాంకుపై తీవ్ర ప్రభావం చూపే అవకాశం ఉంది.