ఏపీలో త్వరలో బీసీ రక్షణ చట్టం: ముసాయిదా బిల్లు సిద్ధం

ఏపీ బీసీ సంక్షేమ శాఖ మంత్రి సవిత విజయవాడలో బీసీ కుల సంఘాలతో సమావేశమై, రాష్ట్రంలో త్వరలో బీసీ రక్షణ చట్టం తీసుకువస్తామని ప్రకటించారు. ఎస్సీ, ఎస్టీ అట్రాసిటీ చట్టం తరహాలోనే ఈ చట్టం ఉంటుందని ఆమె వివరించారు.

బీసీలపై జరిగే దాడులు, హత్యలు, ఆస్తుల అక్రమ ఆక్రమణల నుంచి రక్షణ కల్పించడమే లక్ష్యమని మంత్రి తెలిపారు. ముసాయిదా బిల్లు ఇప్పటికే సిద్ధమైందని, దీనిని గ్రూప్ ఆఫ్ మినిస్టర్స్, న్యాయ శాఖ, హోం శాఖ, ఏజీ సలహాలతో రూపొందించినట్లు చెప్పారు.

ప్రస్తుతం జరిగిన సమావేశంలో మంత్రులు, ఎమ్మెల్యేలు, ఎంపీలు, అధికారులు పాల్గొని ముసాయిదా బిల్లుపై చర్చించారు. ఇక జిల్లా స్థాయిలో బీసీ సంఘాలు, చైర్మన్లతో సంప్రదింపులు జరిపి వారి సూచనలు తీసుకుంటామని, అవసరమైన మార్పులు చేశాక బిల్లును అసెంబ్లీలో ప్రవేశపెడతామని సవిత తెలిపారు.

ఈ చట్టానికి సంబంధించి సీఎం చంద్రబాబు నాయుడు దృష్టికి కూడా ప్రతిపాదనలు తీసుకెళతామని ఆమె చెప్పారు. గతంలో ఎన్టీఆర్ హయాంలో బీసీలకు ప్రత్యేక గుర్తింపు ఇచ్చిన విషయాన్ని కూడా మంత్రి ప్రస్తావించారు.