GTM-2026 అవార్డుల్లో ఆంధ్రప్రదేశ్‌కు 'అత్యుత్తమ పర్యాటక ప్రచార రాష్ట్రం' అవార్డు

గ్లోబల్ ట్రావెల్ మార్కెట్ (GTM) 2026 అవార్డుల్లో ఆంధ్రప్రదేశ్ ‘అత్యుత్తమ పర్యాటక ప్రచార రాష్ట్రం’ అవార్డు గెలుచుకుంది. రాష్ట్ర పర్యాటక శాఖ మంత్రి కందుల దుర్గేష్ కేరళలో జరిగిన కార్యక్రమంలో ఈ అవార్డును అందుకున్నారు.

పర్యాటక మౌలిక సదుపాయాల విస్తరణ, డిజిటల్ బ్రాండింగ్, పెట్టుబడుల ఆకర్షణ, ఆధ్యాత్మిక, తీరప్రాంత, అడ్వెంచర్ టూరిజం అభివృద్ధి వంటి అంశాల్లో ప్రభుత్వం తీసుకున్న చర్యలను జూరీ ప్రశంసించింది.

అవార్డు అనంతరం మంత్రి దుర్గేష్ మాట్లాడుతూ, ఆంధ్రప్రదేశ్‌ను ప్రపంచ స్థాయి పర్యాటక గమ్యస్థానంగా తీర్చిదిద్దడమే లక్ష్యమని చెప్పారు. ఈ సందర్భంగా ఏపీలో పెట్టుబడులు పెట్టేందుకు దేశ విదేశీ సంస్థలను ఆయన ఆహ్వానించారు.

2027 సెప్టెంబర్ 27న ప్రపంచ పర్యాటక దినోత్సవాన్ని ఆంధ్రప్రదేశ్‌లో నిర్వహించాలని నిర్ణయించినట్లు దుర్గేష్ తెలిపారు. ఈ అవార్డు రాష్ట్ర ప్రభుత్వ ప్రయత్నాలకు లభించిందని, ముఖ్యమంత్రి చంద్రబాబు నాయుడు, ఉప ముఖ్యమంత్రి పవన్ కళ్యాణ్ నాయకత్వంలో, కేంద్రం సహకారంతో ఏపీ పర్యాటక రంగం వృద్ధి చెందుతోందని చెప్పారు.