పంట అవశేషాల కాల్చివేత నివారణకు బయోమాస్ టెక్నాలజీ వైపు ఏపీ ప్రభుత్వం

ఏపీ ప్రభుత్వం పంట అవశేషాల కాల్చివేత సమస్యను తగ్గించడానికి బయోమాస్ టెక్నాలజీ ఆధారిత వ్యూహాన్ని పరిశీలిస్తోంది. నాసా - ఇస్రో గణాంకాల ప్రకారం 2024లో రాష్ట్రంలో సుమారు 33 వేల వ్యవసాయ మంటలు నమోదయ్యాయి. ఈ నేపథ్యంలో పంట వ్యర్థాలను ఆర్థిక విలువతో కూడిన ఉత్పత్తులుగా మార్చాలని నిర్ణయించింది.

పశ్చిమ గోదావరి, కృష్ణ, తూర్పు గోదావరి, గుంటూరు, ఏలూరు జిల్లాల్లో వరి కోత తర్వాత ఎకరాకు 2.5 నుంచి 5 టన్నుల వరకు గడ్డి అవశేషాలు మిగిలిపోతున్నాయి. వీటిని చేతులతో తొలగించడం ఖర్చుతో కూడుకున్నది కావడంతో రైతులు వాటిని కాల్చివేస్తున్నారు. ప్రభుత్వం ఈ వ్యర్థాలకు సరైన వాణిజ్య విలువ, సమర్థవంతమైన సేకరణ వ్యవస్థ అందుబాటులోకి తెస్తే రైతులు కాల్చకుండా అమ్ముకునేలా ప్రోత్సాహం లభిస్తుందని భావిస్తోంది.

సేకరించిన వరిగడ్డిని పునర్వినియోగం చేయడం ద్వారా పర్యావరణ పరిరక్షణతో పాటు రైతులు, గ్రామీణ ప్రాంతాలకు అదనపు ఆదాయం, ఉపాధి అవకాశాలు కల్పించాలన్నది ప్రభుత్వ లక్ష్యం. అధికారులు ఈ దిశగా ఆచరణాత్మక నమూనాలను అధ్యయనం చేస్తున్నారు. ఈ వ్యవస్థ అమల్లోకి వస్తే, లక్షల మంది రైతులకు సంవత్సరానికి సుమారు రూ.600 కోట్ల అదనపు ఆదాయం లభిస్తుందని అంచనా. భారీగా ప్రత్యక్ష, పరోక్ష ఉద్యోగాలు కూడా లభ్యమవుతాయని ప్రభుత్వం పేర్కొంది.