AP క్యాబినెట్ 34 ఎజెండా అంశాలకు ఆమోదం; PPP పాలసీ, రెండు ప్రైవేట్ వర్సిటీలకు ఆమోదం

ముఖ్యమంత్రి చంద్రబాబు నాయుడు అధ్యక్షతన సచివాలయంలో జరిగిన రాష్ట్ర మంత్రివర్గ సమావేశం సుమారు మూడున్నర గంటలు కొనసాగింది. ఈ సమావేశంలో మొత్తం 34 ఎజెండా అంశాలకు ఆమోదం లభించింది.

పారిశ్రామిక అభివృద్ధికి ఊతంగా పబ్లిక్ ప్రైవేట్ పార్ట్నర్‌షిప్ (PPP) విధాన ముసాయిదాకు, స్పీడ్ ఆఫ్ డూయింగ్ బిజినెస్ పాలసీకి ఆమోదం తెలిపారు. పెట్టుబడులను ఆకర్షించి ఉపాధి కల్పించడమే లక్ష్యంగా ఈ నిర్ణయాలు తీసుకున్నారు. రెండు ప్రైవేట్ యూనివర్సిటీల ఏర్పాటుకు, కొత్త జిల్లాల్లో 15 డీఈఓ (జిల్లా విద్యా అధికారి) పోస్టుల మంజూరుకు సైతం అనుమతి లభించింది.

CRDA పరిధిలోని క్వాంటం టవర్స్ (టవర్-1, టవర్-2) నిర్మాణానికి L&T సంస్థకు రూ.1000 కోట్లకు పైగా విలువైన టెండర్లు, రుణ గ్యారెంటీ ఇచ్చేందుకు క్యాబినెట్ ఆమోదం తెలిపింది. అమరావతిలో వివిధ సంస్థలకు భూకేటాయింపులకు, సంవత్సరాలుగా పెండింగ్‌లో ఉన్న భూ సమస్యలను 400 కుటుంబాలకు ప్రయోజనం కలిగేలా పరిష్కరించే ప్రతిపాదనకు కూడా ఆమోదం లభించింది.

ఈ నెలాఖరు లోపల వెలుగొండ ప్రాజెక్టు ప్రారంభించి నల్లమల సాగర్‌కు నీరు అందించాలని సీఎం లక్ష్యంగా పెట్టుకున్నారు. ప్రస్తుతం జలాశయాల్లో నిల్వలు తాగునీటి అవసరాలకు మాత్రమే సరిపోతాయని, పశుగ్రాసానికి ప్రాధాన్యం ఇవ్వాలని సూచించారు. ఈ నెల 17 నుంచి 20 వరకు అసెంబ్లీ సమావేశాలు నిర్వహిస్తున్నట్లు కూడా సీఎం తెలిపారు.