ఏపీ కేబినెట్ 35 ప్రతిపాదనలకు ఆమోదం; బీచ్ షాక్స్, కేజ్ కల్చర్ విధానాలకు గ్రీన్ సిగ్నల్

అమరావతి సచివాలయంలో జరిగిన ఏపీ కేబినెట్ సమావేశంలో 35 అంశాలపై చర్చించి పలు కీలక ప్రతిపాదనలకు ఆమోదం తెలిపినట్టు మంత్రి కొలుసు పార్థసారథి తెలిపారు.

ముఖ్యమైన నిర్ణయాల్లో భాగంగా, మానవ అవయవాల మార్పిడి, కణజాల చట్టం (2011 కేంద్ర చట్టం) ను ఏపీలో అమలు చేసేందుకు అనుమతి ఇచ్చారు. బీచ్ షాక్స్ పాలసీకి గ్రీన్ సిగ్నల్ ఇవ్వగా, భీమిలి, విశాఖ, శ్రీకాకుళం, చీరాల బీచ్‌లలో పైలట్ ప్రాజెక్ట్‌గా అమలు చేయనున్నారు. గోవా, మహారాష్ట్ర, ఒడిస్సా విధానాలను అధ్యయనం చేసి ఈ విధానాన్ని రూపొందించారు. ఫలితాలను బట్టి భవిష్యత్తులో ఇతర తీర ప్రాంతాలకు విస్తరిస్తారు.

రాష్ట్ర రిజర్వాయర్లలో కేజ్ కల్చర్ (పంజరాల్లో చేపల పెంపకం) విధానం 2025 ముసాయిదాకు ఆమోదం తెలిపారు. మద్దు వలస ఏలేరు రిజర్వాయర్లలో షిషన్ ఇండియా ప్రైవేట్ లిమిటెడ్‌కు యూనిట్ల ఏర్పాటుకు అనుమతి ఇచ్చారు. ఏపీ ఏవియేషన్ పాలసీ 2026కు కూడా ఆమోదం లభించింది.

అమరావతి అభివృద్ధి పనుల్లో భాగంగా కృష్ణా నది ఒడ్డున అమరావతి ఐ ప్రాజెక్ట్ అభివృద్ధికి టెండర్లు ఆహ్వానించడానికి అనుమతి ఇచ్చారు. హైకోర్టు భవనం బాహ్య సౌందర్యీకరణ, రూఫ్ టాప్, పార్కింగ్, రోడ్లు, సబ్ స్టేషన్ వంటి పనులకు రూ. 547 కోట్ల పరిపాలన అనుమతికి మంత్రిమండలి ఆమోదం తెలిపింది.

అగ్రిగోల్డ్ డిపాజిటర్ల కేసుల పరిష్కారానికి 21 కొత్త పోస్టుల మంజూరుకు, చిత్తూరు జిల్లాలో పీఎం కుసుం పథకం కింద సోలార్ ప్లాంట్ల ఏర్పాటుకు ఎన్ఆర్ఈడిసిఏపీకి 30 ఏళ్ల లీజుకు అనుమతి ఇచ్చారు. క్వాంటం బ్యాకి భూమి రిజిస్ట్రేషన్‌పై స్టాంప్ డ్యూటీ, రిజిస్ట్రేషన్ ఫీజు మినహాయింపుకు కూడా ఆమోదం ఇచ్చారు.

ముఖ్యమంత్రి చంద్రబాబు నాయుడు అగ్రిగోల్డ్ కేసులు, అక్రమాలపై వెంటనే చర్యలు తీసుకోవాలని మంత్రుల కమిటీని ఏర్పాటు చేసి ఆదేశాలు జారీ చేసినట్టు సమాచారం.