ఏపీ కేబినెట్‌లో 37 అంశాలకు ఆమోదం: అమరావతి అభివృద్ధికి గ్రీన్ సిగ్నల్

ముఖ్యమంత్రి చంద్రబాబు నాయుడు అధ్యక్షతన మూడు గంటలకు పైగా జరిగిన ఆంధ్రప్రదేశ్ మంత్రివర్గ సమావేశంలో మొత్తం 37 ప్రతిపాదనలకు ఆమోదం లభించింది.

అమరావతి నగర అభివృద్ధిలో భాగంగా కృష్ణా నది తీరాన ఆరు ఎకరాల్లో 'అమరావతి ఐ' ప్రాజెక్టుకు టెండర్లు ఆహ్వానించేందుకు కేబినెట్ అనుమతి ఇచ్చింది. రాజధాని ప్రాంత గ్రామ ఖంఠాల్లో భూమి కోల్పోయిన వారికి తిరిగి అదే ప్రాంతంలో గరిష్ఠంగా 5 సెంట్ల భూమి కేటాయించే ప్రతిపాదనను మంత్రివర్గం ఆమోదించింది.

రిజర్వాయర్లలో చేపల పెంపకం కోసం ఆంధ్రప్రదేశ్ రిజర్వాయర్ల కేజ్ కల్చర్ పాలసీ 2025 ముసాయిదాకు, మడ్డువలస, ఏలేరు జలాశయాల్లో కేజ్ కల్చర్ యూనిట్ల ఏర్పాటుకు ఆమోదం తెలిపింది. హైకోర్టు భవన సముదాయంలో ప్రీస్ట్ ఫిన్స్, వాటర్ బాడీస్, ఎక్స్టర్నల్ రోడ్ల పనుల కోసం 547.07 కోట్ల రూపాయల నిధులకు కూడా గ్రీన్ సిగ్నల్ లభించింది.

విమానయాన రంగంలో అడ్వాన్స్డ్ ఎయిర్ మొబిలిటీని పెంచే ఏపీ ఏవియేషన్ పాలసీ 2031కి కేబినెట్ ఆమోదం తెలిపింది. ఈ పాలసీ ద్వారా ప్యాసింజర్ మార్కెట్ వాటాను 2025 నాటి 1.5% నుండి 2035 నాటికి 4%కి, ఎయిర్ కార్గోను 2% నుండి 5%కి పెంచడం లక్ష్యం. ప్రస్తుతం 6,240 మెట్రిక్ టన్నుల కార్గోను 4,27,500 మెట్రిక్ టన్నులకు పెంచడానికి ఇది ఉపయోగపడుతుంది.

పోలవరం ఎడమ ప్రధాన కాలువ ప్యాకేజీ-5 పరిధిలో మిగిలిన పనులకు 796.66 కోట్ల సవరించిన అంచనాలకు పరిపాలన ఆమోదం లభించింది. మధురవాడలో స్టార్ హోటళ్లు, రిసార్టుల అభివృద్ధికి ఏపీటీసీకి 9.39 ఎకరాల భూమి బదలాయింపు, చీరాల-విశాఖ తీరాల్లో బీచ్ ఎక్సైజ్ పాలసీ పైలట్ ప్రాజెక్టు అమలు వంటి నిర్ణయాలు కూడా తీసుకున్నారు. ఇవి కాకుండా జూలై 1 నుంచి విబిజి రాంజీ గ్రామీణ చట్టం అమలు, మానవ అవయవాల మార్పిడి సవరణ ఆర్డినెన్సుకు ఆమోదం, అగ్రిగోల్డ్ డిపాజిటర్ల కేసుల విచారణ వేగవంతం చేసేందుకు 21 కొత్త పోస్టుల మంజూరు వంటి ఇతర నిర్ణయాలు కూడా కేబినెట్ తీసుకుంది.