పాదచారుల భద్రత పాలసీకి ఆమోదం, దిశ సవరణ బిల్లు ఉపసంహరణ

అమరావతిలో జరిగిన రాష్ట్ర మంత్రిమండలి సమావేశంలో పలు కీలక నిర్ణయాలు తీసుకున్నారు. మంత్రి కోలుసు పార్థసారథి మీడియాకు వివరాలు వెల్లడించారు.

పాదచారుల మరణాలను పూర్తిగా నిర్మూలించే లక్ష్యంతో ‘ఆంధ్రప్రదేశ్ పాదచారుల భద్రత, యూనివర్సల్ యాక్సెసిబిలిటీ పాలసీ 2026’ ను క్యాబినెట్ ఆమోదించింది. రోడ్‌ డిజైన్లలో వాహనాలతోపాటు పాదచారులను కూడా దృష్టిలో ఉంచుకోవాలని, శారీరక వైకల్యం ఉన్నవారికి అనువుగా ఫుట్‌పాత్‌లు, క్రాసింగ్‌లు రూపొందించాలని సీఎం చంద్రబాబు నాయుడు సూచించారు. పట్టణ స్థానిక సంస్థలు, పోలీసు, రెవెన్యూ శాఖల సమన్వయంతో అవరోధ రహిత పాదచారి మార్గాలు నిర్మించనున్నారు.

ఆంధ్రప్రదేశ్ దిశా బిల్లు (క్రిమినల్ లా సవరణ) 2019 ను ఉపసంహరించుకోవాలని నిర్ణయించారు. కేంద్ర ప్రభుత్వం తీసుకొచ్చిన భారతీయ న్యాయ సంహిత, భారతీయ నాగరిక సురక్షా సంహిత 2023 లో దిశా బిల్లు లక్ష్యాలు గణనీయంగా పరిష్కారమయ్యాయని న్యాయశాఖ, డీజీపీ నివేదించాయి. గతంలో కేంద్ర ఆమోదం లేకుండానే దిశ పోలీస్ స్టేషన్ల ఏర్పాటు జరిగిందని మంత్రి విమర్శించారు.

ఆక్వా రైతులకు యూనిట్‌కు రూ.1.50 చొప్పున ఇస్తున్న విద్యుత్ టారిఫ్ రాయితీని ఏప్రిల్ 1, 2026 నుంచి పొడిగించారు. సుమారు 5.79 లక్షల ఎకరాల ఆక్వా విస్తీర్ణం ఉండగా, 1,150 కోట్ల రూపాయల సబ్సిడీ రైతులకు అందుతుంది. గత ప్రభుత్వం 2022-23లో రూ.404.97 కోట్లు మాత్రమే ఇచ్చిందని మంత్రి పేర్కొన్నారు.

పారిశ్రామిక పార్కుల్లో విద్యుత్ మౌలిక సదుపాయాల సూపర్విజన్ చార్జీలను 2.5% కు తగ్గించారు. ట్రాన్స్‌కో/డిస్కంల పర్యవేక్షణలో ప్రైవేట్ సంస్థలు మౌలిక సదుపాయాలు ఏర్పాటు చేసుకోవచ్చు. అలాగే కండలేరు రిజర్వాయర్ నుంచి శ్రీసిటీ పారిశ్రామిక క్లస్టర్‌కు నీటి సరఫరా కోసం తిరుపతి జిల్లా రిజర్వ్ ఫారెస్ట్‌లో 1.76 హెక్టార్ల భూమి వాడినందుకు పరిహారంగా రాపూరు మండలం పంగిలి గ్రామంలో 8.7 ఎకరాల భూమి కేటాయించారు.

పీఎం కుసుం ఫీడర్ సోలరైజేషన్ పథకంలో భాగంగా వైఎస్సార్ కడప జిల్లా పోరుమామిళ్ల, వేముల గ్రామాల్లో 49.67, 51.37 ఎకరాల భూమిని నెట్‌క్యాప్‌కు లీజుకు ఇచ్చే ప్రతిపాదనకు ఆమోదం తెలిపారు. శ్రీ సత్యసాయి, అన్నమయ్య, కోనసీమ జిల్లాల్లోని మూడు పంచాయతీల్లో తెలుగుదేశం పార్టీ కార్యాలయాల నిర్మాణానికి రెండేసి ఎకరాల భూమి కేటాయించారు. బత్తలపల్లి మండలం ఏదుల ముస్తూరు గ్రామంలో 19.55 ఎకరాలను ఎకరాకు రూ.30 లక్షల చొప్పున ఏపీఐఐసీకి బదిలీ చేసేందుకు, చిత్తూరు మండలం తిమ్మసముద్రంలో 13.47 ఎకరాలను చిత్తూరు అర్బన్ డెవలప్మెంట్ అథారిటీకి లేఔట్ అభివృద్ధికి బదిలీ చేయడానికి కూడా క్యాబినెట్ ఆమోదించింది. నూతనంగా పునర్వ్యవస్థీకరించిన జిల్లాల పరిధికి అనుగుణంగా అర్బన్ డెవలప్మెంట్ అథారిటీలను పునర్వ్యవస్థీకరించాలని నిర్ణయించారు.