ఏపీ క్యాబినెట్ కీలక నిర్ణయాలు: అమరావతి కన్వెన్షన్ సెంటర్, ట్విన్ టవర్లకు గ్రీన్ సిగ్నల్

ఏపీ సీఎం చంద్రబాబు నాయుడు అధ్యక్షతన మంత్రివర్గ సమావేశం జరిగింది. ఈ సమావేశంలో 34 అంశాలపై చర్చించి పలు కీలక నిర్ణయాలు తీసుకున్నారు.

అమరావతి కన్వెన్షన్ సెంటర్ నిర్మాణానికి గ్రీన్ సిగ్నల్ ఇచ్చారు. గతంలో కేటాయించిన భూములను రద్దు చేసి కొత్త కేటాయింపులు చేపట్టాలని నిర్ణయించారు. బల్క్ డ్రగ్ పార్క్ కోసం రూ.680.22 కోట్ల రుణం మంజూరుకు ఆమోదం లభించింది.

కొత్త జిల్లాల ఏర్పాటుకు అనుగుణంగా అర్బన్ డెవలప్‌మెంట్ అథారిటీల (UDA) సంఖ్యను 21 నుంచి 23కు పెంచుతూ నిర్ణయం తీసుకున్నారు. 17 యూడీఏలు రెండు కంటే ఎక్కువ జిల్లాల్లో విస్తరించి ఉన్నందున వాటిని పునర్వ్యవస్థీకరించాలని నిర్ణయించారు. అమరావతి 'ఐ' ప్రాజెక్టుకు సవరించిన టెండర్లకు ఆమోదం తెలిపారు. ఈ ప్రాజెక్టు నిర్మాణానికి ప్రత్యేక ప్రోత్సాహకాలు కూడా ఇవ్వనున్నారు.

వ్యాపార సౌలభ్యం కోసం ఓమ్నిబస్ చట్టం-2026 ను తీసుకొచ్చారు. కుప్పం గ్రీన్‌ఫీల్డ్ విమానాశ్రయం భూసేకరణ కింద 'డిఫామ్ లేని' సాగుదారులకు ఎకరాకు రూ.12.44 లక్షల నష్టపరిహారం ఇవ్వాలని నిర్ణయించారు. అమరావతిలో 47 అంతస్తుల ట్విన్ టవర్స్ నిర్మాణానికి ఆమోదం లభించింది. కార్పొరేట్, క్వాంటం సంస్థలకు ఇక్కడ అవకాశం కల్పిస్తారు. హైకోర్టు భవనం రీడిజైన్ ప్రతిపాదనకు కూడా గ్రీన్ సిగ్నల్ ఇచ్చారు.

పీపీపీ పాలసీ-2026కు మంత్రివర్గం ఆమోదం తెలిపింది. పీపీపీ ప్రాజెక్టులకు రూ.1,500 కోట్ల వయబిలిటీ గ్యాప్ ఫండింగ్ ఏర్పాటు చేయాలని నిర్ణయించారు. రెండు ప్రైవేట్ విశ్వవిద్యాలయాల ఏర్పాటుకు అనుమతి ఇచ్చారు. ఇందులో ఆర్బీఎస్ ప్రగతి విశ్వవిద్యాలయం ఒకటి. విద్యాశాఖలో 15 కొత్త డీఈఓ పోస్టులు భర్తీ చేయాలని నిర్ణయించారు.

సమావేశంలో సీఎం మాట్లాడుతూ, అమరావతిలో నిర్మించే భవనాలు తెలుగు సంస్కృతి, సంప్రదాయాలను ప్రతిబింబించేలా డిజైన్ చేయాలని సూచించారు. సీఆర్డీఏ, పురపాలక శాఖలు దీనిపై ప్రత్యేక శ్రద్ధ వహించాలన్నారు.