ఏపీ క్యాబినెట్ కీలక నిర్ణయాలు; అమరావతి ప్రాజెక్టులు, అసెంబ్లీ సమావేశాలు, డీఈవో నియామకాలు

ఏపీ క్యాబినెట్ ఈరోజు సమావేశమై పలు అభివృద్ధి ప్రాజెక్టులకు ఆమోదం తెలిపింది. ఇందులో అమరావతి కన్వెన్షన్ సెంటర్ నిర్మాణం, బల్క్ డ్రగ్ పార్క్ కోసం 680 కోట్ల రూపాయల రుణం, కొత్త పిపిపి పాలసీ 2026, రెండు ప్రైవేట్ విశ్వవిద్యాలయాలు, విద్యాశాఖలో 15 కొత్త డీఈవో పోస్టులు మంజూరు చేయడం వంటివి ఉన్నాయి.

అమరావతిలో ఇన్నర్ రింగ్ రోడ్డు, స్పీడ్ రైళ్ల కోసం కొత్త రైల్వే ట్రాక్ ఏర్పాటుకు 2000 ఎకరాల భూసేకరణకు క్యాబినెట్ అనుమతిస్తూ సీఆర్డీఏకి బాధ్యత అప్పగించింది. హైకోర్టు భవన విస్తరణకు రూ.200 కోట్లు, క్వాంటం టవర్స్ (ట్విన్ టవర్స్) నిర్మాణానికి రూ.1000 కోట్ల వ్యయంతో ప్రణాళికలకు ఆమోదించాయి. భవనాల డిజైన్లు తెలుగు సంస్కృతి సంప్రదాయాలు ప్రతిబింబించేలా ఉండాలని సీఎం చంద్రబాబు నాయుడు సూచించారు.

ఈ సమావేశంలో డీఈవో నియామకాల్లో 50% పోస్టులు ఏపీపీఎస్సీ గ్రూప్ 1 ద్వారా రిక్రూట్ చేయాలని నిర్ణయించారు. స్పీడ్ ఆఫ్ డూయింగ్ బిజినెస్ పేరుతో ఓమ్నీ బస్ 2026 యాక్ట్‌ను తీసుకురానున్నారు. పాదచారుల పేవ్‌మెంట్ల కోసం ప్రత్యేక విధానాన్ని రూపొందించే ఉద్దేశం చేశారు. మూడు సహకార చక్కెర ఫ్యాక్టరీల భూములను ఏపీఐసీసీకి అప్పగించి అక్కడ పరిశ్రమలు ఏర్పాటుకు చర్యలు తీసుకోనున్నారు.

వర్షాకాల అసెంబ్లీ సమావేశాలు ఈ నెల 17 నుండి 20 వరకు నిర్వహించాలని నిర్ణయించారు. ప్రభుత్వ సాధించిన ప్రగతి, ఇతర రాజకీయ అంశాలను ప్రజల ముందుకు తీసుకెళ్లేలా షెడ్యూల్ రూపొందించాలని సీఎం మంత్రులకు సూచించారు.

సమావేశంలో శాంతిభద్రతలు, రాజకీయ అంశాలపై చర్చ జరిగింది. వైఎస్ఆర్ సీపీ నేత జగన్ మోహన్ రెడ్డి పర్యటనల్లో శాంతిభద్రతలకు భంగం కలుగుతుందని సీఎం పేర్కొన్నారు. దేవరపల్లిలో ఆ పార్టీ కార్యకర్తలు ఓ షాపును, రైతు పంటలను ధ్వంసం చేశారని ఆరోపించారు. డీఎస్సీ లీక్ ఆరోపణలపై వైఎస్ఆర్ సీపీ చేస్తున్న ప్రచారాన్ని కోర్టు తిరస్కరించిందని, మంత్రులు జిల్లాలవారిగా ప్రజలకు వాస్తవాలు వివరించాలని సూచించారు. ఈ విషయంపై వైఎస్ఆర్ సీపీ స్పందన తెలియాల్సి ఉంది.