నేడు AP క్యాబినెట్ సమావేశం: అమరావతి అభివృద్ధి, సంక్షేమ పథకాలపై చర్చ

సీఎం చంద్రబాబు నాయుడు అధ్యక్షతన సచివాలయంలో ఇవాళ AP మంత్రివర్గం సమావేశం జరగనుంది. ఈ సమావేశంలో అమరావతి రాజధాని ప్రాంతం అభివృద్ధికి సంబంధించిన పలు అంశాలపై చర్చించే అవకాశం ఉంది.

అమరావతిలో హైకోర్ట్ భవనాల పరిసరాల్లో రూ.547 కోట్ల వ్యయంతో మౌలిక సదుపాయాల కల్పనకు క్యాబినెట్ ఆమోదం తెలిపే అవకాశం ఉంది. సీఆర్డీఏ భవన ట్రిబ్యునల్ ఏర్పాటు ప్రతిపాదనకు కూడా గ్రీన్ సిగ్నల్ ఇచ్చే అవకాశం ఉన్నట్టు సమాచారం.

రాజధాని ప్రాంతంలో తొమ్మిది జిల్లాల పరిధిలో అమరావతి ఎకానమిక్ రీజియన్ ఏర్పాటుకు సంబంధించిన RFP ప్రక్రియకు ఆమోదం లభించే అవకాశం ఉంది. ఇంకా, సీఆర్డీఏకు సొంత అగ్నిమాపక విభాగం ఏర్పాటు చేయాలన్న ప్రతిపాదనపై నిర్ణయం తీసుకుంటారు.

పర్యాటక ప్రోత్సాహకంగా PPP విధానంలో డిజైన్, బిల్డ్, ఆపరేట్, ట్రాన్స్ఫర్ మోడల్ ద్వారా అమరావతిలో జాయింట్ అబ్జర్వేషన్ వీల్ నిర్మాణానికి మంత్రివర్గం ఆమోదం తెలుపుతుందని అంచనా. ఇది రాజధానికి ప్రత్యేక ఆకర్షణగా నిలుస్తుంది.

ఎల్పీఎస్ లేఅవుట్లలో ఏటీఎమ్లు, కియోస్క్లు వంటి మౌలిక సదుపాయాల ఏర్పాటుకు, సిటీ గ్యాస్ డిస్ట్రిబ్యూషన్ నెట్వర్క్ను PPP లేదా జాయింట్ వెంచర్ విధానంలో ఏర్పాటు చేయడంపై చర్చించబోతున్నారు. నెగోషియబుల్ సెటిల్మెంట్ పాలసీ కింద ఐదు సెంట్ల వరకు భూమి కేటాయింపుకు అనుమతి లభించే అవకాశం ఉంది.

గతంలో తీసుకున్న డిస్ట్రిక్ట్ కూలింగ్ సిస్టం టాబ్ బ్రీడ్ ఒప్పందాన్ని రద్దు చేసి కొత్తగా టెండర్లు పిలిచే అంశంపై నిర్ణయం ఉంటుంది. మారిన అలాట్మెంట్ కోడ్ ఉన్న 495 మంది రైతులకు రిజిస్ట్రేషన్ ఫీసు మినహాయింపు ప్రతిపాదనకు ఆమోదం ఇస్తారని సమాచారం.

సంక్షేమ విభాగంలో 'తల్లికి వందనం' పథకానికి నిధుల విడుదలపై చర్చ జరిగే అవకాశం ఉంది. ఈ సమావేశంలో రాజకీయ అంశాలు కూడా చర్చకు రానున్నాయి. వైసీపీ విమర్శలు, ఆరోపణలపై సీఎం మంత్రులతో చర్చిస్తారు. అలాగే, తమ రెండేళ్ల పాలనలో చేపట్టిన కార్యక్రమాలు, తాజా రాజకీయ పరిణామాలపై సమీక్ష నిర్వహిస్తారు.