ఏపీ క్యాబినెట్ భేటీ: 45 అంశాలపై చర్చ, Arnab తుఫానుపై ప్రత్యేక సమీక్ష

ఆంధ్రప్రదేశ్ మంత్రివర్గ సమావేశం ఉండవల్లిలోని సీఎం క్యాంప్ కార్యాలయంలో ప్రారంభమైంది. సమావేశం వర్చువల్ విధానంలో కొనసాగుతోంది.

మంత్రులు నారా లోకేష్, నాదెండ్ల మనోహర్ ప్రత్యక్షంగా హాజరయ్యారు. డిప్యూటీ సీఎం పవన్ కల్యాణ్, మిగతా మంత్రులు వర్చువల్‌గా హాజరయ్యారు.

ఈ భేటీలో 45కు పైగా అజెండా అంశాలపై చర్చ జరగనుంది. SIPB పెట్టుబడుల నిర్ణయాలు, ఉద్యోగ కల్పన ప్రతిపాదనలపై ప్రధానంగా చర్చించనున్నారు. అమరావతి సమీపంలోని పల్నాడు జిల్లా పరిధిలో Quantum Hardware మాన్యుఫ్యాక్చరింగ్ పార్క్ ఏర్పాటుపై నిర్ణయం తీసుకునే అవకాశం ఉంది.

విజయనగరం జిల్లా శ్రీరాంపురంలో ₹5,000 కోట్ల పెట్టుబడుల ప్రతిపాదనలపైనా సమావేశంలో నిర్ణయం తీసుకునే అవకాశం ఉంది. వైఎస్సార్ కడప జిల్లా జమలమడుగులో శ్రీ సిమెంట్‌కు 452 ఎకరాలు, జైరాజ్ ఇస్పాత్‌కు 418 ఎకరాల భూ కేటాయింపుపై చర్చ జరగనుంది. కర్నూలు జిల్లా భూ కేటాయింపుల అంశం కూడా ఎజెండాలో ఉంది.

Arnab తుఫానుపై ఈ భేటీలో ప్రత్యేక సమీక్ష జరగనుంది. తుఫాను ప్రభావిత ప్రాంతాల పరిస్థితిపై సీఎం చంద్రబాబు నాయుడు ఇప్పటికే అధికారులతో సమీక్ష నిర్వహించారు. కాకినాడ, కోనసీమ, విజయనగరం, విశాఖపట్నం, శ్రీకాకుళం జిల్లాల నష్ట వివరాలను కేంద్ర హోమ్ మంత్రికి తెలిపారు. కేంద్ర బృందాన్ని వెంటనే పంపించాలని కోరారు.

నష్టపరిహారం కూడా ప్రకటించారు. పాక్షికంగా దెబ్బతిన్న ఇళ్లకు ₹10,000, దెబ్బతిన్న ద్విచక్ర వాహనాలకు ₹3,000 ఇవ్వాలని నిర్ణయించారు. మృతి చెందిన కుటుంబాలకు ₹5 లక్షల ఎక్స్‌గ్రేషియా ఇస్తారు.

భేటీ అనంతరం సీఎం చంద్రబాబు కోనసీమ జిల్లాలో పర్యటించనున్నారు. మధ్యాహ్నం 12:30 తర్వాత కాట్రేనికోన మండలం చెయ్యేరుకు చేరుకుంటారు.