తునిలో మిస్సింగ్ చిన్నారి తల్లిదండ్రులను కలిసిన బాలల హక్కుల కమిషన్ చైర్మన్

కాకినాడ జిల్లా తుని సీహెచ్ అగ్రహారంలో 14 రోజులుగా మిస్సింగ్‌లో ఉన్న చిన్నారి జ్ఞానేశ్వరి ఇంటికి ఏపీ రాష్ట్ర బాలల హక్కుల పరిరక్షణ కమిషన్ చైర్మన్ సూర్యనారాయణ రాజు చేరుకున్నారు. తల్లిదండ్రులను పరామర్శించి, కుటుంబానికి అన్ని విధాలా సహాయం అందిస్తామని ఆయన హామీ ఇచ్చారు.

బాలిక కోసం పోలీసులు, కేంద్ర-రాష్ట్ర బలగాలు 120 మందికి పైగా సిబ్బందితో వివిధ డ్రోన్ల సాయంతో గాలింపు చేపట్టినట్లు సూర్యనారాయణ రాజు తెలిపారు. సుమారు 1000 ఎకరాల విస్తీర్ణంలో ఫోటోలు తీసి చూశామని, ప్రతిరోజూ అధికారులతో సమీక్ష సమావేశాలు నిర్వహిస్తున్నామని చెప్పారు.

బాలిక తప్పిపోయిన సమయం నుంచి నిరంతరం ప్రయత్నాలు జరుగుతున్నప్పటికీ ఆచూకీ తెలియలేదని, జిల్లా యంత్రాంగం, పోలీసులను ఇప్పటికే ప్రశ్నించామని ఆయన వెల్లడించారు. సాధ్యమైనంత త్వరగా ఆమె క్షేమంగా ఇంటికి చేరుతుందనే ఆశాభావాన్ని ఆయన వ్యక్తం చేశారు.