గుంటూరులో APSRTC ఉద్యోగుల నిరసన: కొత్త బస్సులు RTC ద్వారానే నడపాలని డిమాండ్

ఏపీఎస్ఆర్టీసీ కార్మికుల ఉమ్మడి కార్యాచరణ సమితి (జేఏసీ) గుంటూరు కలెక్టరేట్ వద్ద నిరసన చేపట్టింది. ఎలక్ట్రిక్, సీఎన్జీ వంటి కొత్త బస్సులను ఆర్టీసీ సంస్థే నడపాలని వారు డిమాండ్ చేశారు.

ఈ సందర్భంగా కలెక్టర్‌కు వినతి పత్రం అందజేశారు. ఎలక్ట్రిక్ బస్సుల పేరిట ప్రైవేట్ సంస్థలకు ఆర్టీసీని అప్పగించే ప్రయత్నాలు జరుగుతున్నాయని ఆరోపించారు. ఆధునీకరణకు తాము సిద్ధమేనని, కానీ ప్రజారవాణా వ్యవస్థను ప్రైవేట్ చేతుల్లోకి నెట్టడం సరికాదని స్పష్టం చేశారు.

గుంటూరు జిల్లాలో 1,690 మంది ఉద్యోగులు ఉండగా, 1,600 మంది సంతకాలు చేసిన మెమోరాండం ఇచ్చామని జేఏసీ ప్రతినిధి తెలిపారు. రాష్ట్రవ్యాప్తంగా ఇప్పటికే నాలుగు డిపోలు మూసివేశారని, మరో 13 డిపోల మూసివేత ప్రతిపాదన ఉందని చెప్పారు. గతంలోనే 16,000 మంది ఉద్యోగాలు తగ్గాయని, ప్రైవేటీకరణ జరిగితే ఏడాదిలో 20,000 మంది ఉద్యోగాలు పోయే ప్రమాదం ఉందని హెచ్చరించారు.

ప్రైవేట్ ఆపరేటర్లకు బస్స్టాండ్ స్థలాలు, మెయింటెనెన్స్ అప్పగించడంతో ప్రయాణికుల భద్రతకు భంగం కలుగుతుందని, ఆర్టీసీ నైపుణ్యం కోల్పోతుందని వారు అన్నారు. ఈ మెమోరాండాన్ని ముఖ్యమంత్రికి చేరవేయాలని కోరారు. ప్రభుత్వం నుంచి స్పందన లభించనట్లయితే తదుపరి కార్యాచరణ చేపడతామని సూచించారు.