7,450 గ్రామాల్లో 32 లక్షల పట్టాధార పాసుపుస్తకాలు జారీ: బ్లాక్‌చెయిన్‌తో ట్యాంపరింగ్‌కు తావు లేదంటూ సీఎం చంద్రబాబు

ముఖ్యమంత్రి చంద్రబాబు నాయుడు రెవెన్యూ అధికారులు, కలెక్టర్లతో సమీక్ష నిర్వహించారు. ఇప్పటివరకు రాష్ట్రంలో 7,450 గ్రామాల్లో 32,02,346 పట్టాధార పాసుపుస్తకాలు రైతులకు అందజేసినట్లు ఆయన తెలిపారు.

ఈ పాసుపుస్తకాలు కరెన్సీ తరహా భద్రతా లక్షణాలతో భద్రతా ముద్రణాలయంలో ముద్రించినట్లు సీఎం వివరించారు. డిజిటల్ రికార్డులతో అనుసంధానం చేసి బ్లాక్‌చెయిన్ టెక్నాలజీ ఉపయోగించడం వల్ల ఎవరూ ట్యాంపరింగ్ చేయలేరని చెప్పారు. డిజిటల్ రికార్డుల్లో మార్పులు జరిగితే భౌతిక పాసుపుస్తకం చెల్లుబాటు కాదని హెచ్చరించారు.

ప్రతి నెలా 9వ తేదీన పాసుపుస్తకాల పంపిణీపై సమీక్ష నిర్వహిస్తున్నట్లు చంద్రబాబు నాయుడు పేర్కొన్నారు. ఇప్పటివరకు ఏడు నెలల సమీక్ష పూర్తయిందని, మరో ఏడు నెలల్లో అన్ని గ్రామాల్లో పూర్తి చేయాలని అధికారులను ఆదేశించారు.

ఈ సమావేశంలో రెవెన్యూ మంత్రి సత్యప్రసాద్, ప్రభుత్వ ప్రధాన కార్యదర్శి సాయిప్రసాద్, ఇతర అధికారులు పాల్గొన్నారు.