ఏపీ ఇంజనీరింగ్ ప్రవేశాలు జాప్యం; ఫీజు కమిటీ నియామకం లేక కౌన్సిలింగ్‌పై అనిశ్చితి

ఆంధ్రప్రదేశ్‌లో ఇంజనీరింగ్ ప్రవేశాల నిర్వహణ జాప్యం కానుంది. కాలేజీల ఫీజు నిర్ణయించే కమిటీ ఇంకా నియమించకపోవడంతో కౌన్సిలింగ్ ప్రారంభానికి అనిశ్చితి ఏర్పడింది.

ఫీజుల నియంత్రణ, పర్యవేక్షణ కమిటీ (AFRMC) ఏర్పాటుకు ఏప్రిల్ 10న మంత్రిమండలి ఆమోదం తెలిపింది. కానీ మూడు నెలలు దాటుతున్నా చైర్మన్, కార్యదర్శి, సభ్యుల నియామకం జరగలేదు. దీంతో ఫీజు ఖరారు కోసం నోటిఫికేషన్ విడుదల కాలేదు.

కాలేజీల ఆదాయ వ్యయాలు పరిశీలించి ప్రతి మూడేళ్లకోసారి ఫీజు నిర్ణయించడం ఆనవాయితీ. 2025-26 విద్యా సంవత్సరంతో గతంలో నిర్ణయించిన ఫీజు గడువు ముగిసింది. 2025 డిసెంబర్ 24న ప్రభుత్వం జారీ చేసిన జీవో ప్రకారం ఇంజనీరింగ్ కాలేజీలకు కనీస ఫీజు ₹40,000గా ఉంది. అయితే ఈ ఏడాది దాన్ని ₹60,000కు పెంచాలని యాజమాన్యాలు డిమాండ్ చేస్తున్నాయి. ఏ నిర్ణయం తీసుకోవాలన్నది స్పష్టత లేదు.

ఇదే సమయంలో తెలంగాణలో ఇంజనీరింగ్ కౌన్సిలింగ్ మొదటి విడత ఈ నెల 10లోగా పూర్తి కానుంది. ఏపీలో ప్రైవేట్ డీమ్డ్ విశ్వవిద్యాలయాలు ఇప్పటికే ప్రవేశాలు దాదాపు పూర్తి చేసుకున్నాయి. ప్రైవేటు కాలేజీలు మేనేజ్మెంట్ కోటా సీట్ల కోసం ఒప్పందాలు కుదుర్చుకున్నాయి. అర్హత సాధించిన విద్యార్థులు మాత్రం కౌన్సిలింగ్ కోసం ఎదురు చూస్తున్నారు. కమిటీ నియామకం తర్వాతనే ఫీజు నిర్ణయం జరిగి ప్రవేశాలకు సంబంధించిన నోటిఫికేషన్ వెలువడే అవకాశం ఉంది.