కడప విమానాశ్రయంలో రెండు పైలట్ శిక్షణా కేంద్రాలకు AAI అనుమతులు

కడప విమానాశ్రయంలో పైలట్ శిక్షణా కేంద్రాల ఏర్పాటుకు విమానాశ్రయ అథారిటీ ఆఫ్ ఇండియా (AAI) అనుమతులు ఇచ్చింది. దేశవ్యాప్తంగా ఎంపిక చేసిన 11 కేంద్రాల్లో కడప ఒకటి. ఆంధ్రప్రదేశ్ నుంచి కడప మాత్రమే ఎంపికైంది.

రెండు ప్రైవేట్ సంస్థలు ఈ శిక్షణా కేంద్రాలకు అనుమతులు తీసుకున్నాయి. ఈ నెల 21వ తేదీ నుంచి ఏర్పాటు ప్రక్రియ ప్రారంభం కానుంది. సంస్థల ప్రతినిధులు విమానాశ్రయంలో స్థలం, క్లాస్ రూమ్‌లు, శిక్షణ వసతులను పరిశీలించనున్నారు.

ఒక ఏడాదిలోపు ఏర్పాట్లు పూర్తి చేసి రిక్రూట్‌మెంట్ ప్రక్రియ ప్రారంభించాలని సంస్థలు భావిస్తున్నాయి. పైలట్ సర్టిఫికేట్ కోసం 100 గంటల శిక్షణ అవసరం. విమానాల రాకపోకలు తక్కువగా ఉండే చిన్న విమానాశ్రయాలను ఈ కేంద్రాలకు ఎంచుకున్నారు.

ప్లస్ టూ లేదా ఏదైనా డిగ్రీ పూర్తి చేసిన విద్యార్థులు పైలట్ కోర్సుకు అర్హులు. కడపలో ఈ కేంద్రాలు అందుబాటులోకి రావడం వల్ల ఆంధ్రప్రదేశ్ విద్యార్థులకు అవకాశం లభిస్తుంది. పూర్తి స్థాయిలో శిక్షణా కేంద్రాలు ఒక ఏడాదిలో ప్రారంభమయ్యే అవకాశం ఉంది.