ఏపీలో ఇంజినీరింగ్ కౌన్సెలింగ్‌పై అనిశ్చితి, ఫీజు నిర్ణయం లేక విద్యార్థులు ఎదురు చూపులు

ఏపీలో ఇంజినీరింగ్ కౌన్సిలింగ్ ప్రారంభం కావడానికి అవసరమైన ఫీజుల నిర్ణయం ఇంకా జరగలేదు. ఫీజు నియంత్రణ పర్యవేక్షణ కమిటీ (AFRC) కి చైర్మన్ నియామకం జరగకపోవడంతో ఈ పరిస్థితి ఏర్పడింది.

ఇంజినీరింగ్ ప్రవేశ పరీక్షల ఫలితాలు వెలువడినా, కౌన్సిలింగ్ కోసం విద్యార్థులు వేచి చూడాల్సిన పరిస్థితి నెలకొంది. పక్క రాష్ట్రమైన తెలంగాణలో ఇప్పటికే కౌన్సిలింగ్ ప్రారంభమై, ఈ నెల 10 లోగా మొదటి విడత పూర్తవుతోంది. ఏపీలో ప్రైవేట్ డీమ్డ్ విశ్వవిద్యాలయాలు దాదాపు ప్రవేశాలు పూర్తి చేసుకున్నాయి. ప్రైవేట్ కళాశాలలు యాజమాన్య కోటా సీట్లకు ఒప్పందాలు కుదుర్చుకున్నా, అధికారిక ఫీజు నిర్ణయం లేదు.

AFRC ఏర్పాటుకు ఏప్రిల్ 10 న ఏపీ మంత్రిమండలి ఆమోదం తెలిపింది. కానీ మూడు నెలలు గడిచినా, చైర్మన్, కార్యదర్శి, సభ్యులను నియమించే ప్రక్రియ పూర్తి కాలేదు. సెర్చి కమిటీ కూడా ఏర్పాటు కావాల్సి ఉంది. కమిటీ నియామకంపై నోటిఫికేషన్ వెలువడితే ఫీజులు ఖరారవుతాయి.

గతంలో కళాశాలలకు మూడేళ్లకోసారి ఫీజులు నిర్ణయించేవారు. 2025-26 విద్యా సంవత్సరంతో ఆ పద్ధతి ముగిసింది. ప్రభుత్వం పాత ఫీజులను కొనసాగిస్తుందా, కొత్తవి నిర్ణయిస్తుందా అనే అంశంపై స్పష్టత లేదు. ఉన్నత విద్యాశాఖ ఇప్పటివరకు ఎలాంటి ఆదేశాలు ఇవ్వలేదు.

2025 డిసెంబర్ 24 న ప్రభుత్వం జారీ చేసిన జీఓ ప్రకారం ఇంజినీరింగ్ కళాశాలలకు కనీస ఫీజు రూ.40,000 గా ఉంది. అయితే ఈ ఏడాది కనీస ఫీజును రూ.60,000 కి పెంచాలని కళాశాలల యాజమాన్యాలు డిమాండ్ చేస్తున్నాయి.