బంగారం కొనద్దని PM మోదీ పిలుపుతో AP స్వర్ణకారుల నిరసన

ప్రధాని నరేంద్ర మోదీ ఒక సంవత్సరం పాటు బంగారం కొనవద్దని ప్రజలకు విజ్ఞప్తి చేయడంతో ఆంధ్రప్రదేశ్ వ్యాప్తంగా స్వర్ణకారులు నిరసనలు చేపట్టారు. కర్నూలు, కడప సహా పలు జిల్లాల్లో స్వర్ణకారులు ఆందోళనలు నిర్వహించి స్థానిక ప్రజాప్రతినిధులకు, అధికారులకు వినతి పత్రాలు అందజేశారు.

భారత్-పాకిస్తాన్ ఉద్రిక్తతల నేపథ్యంలో విదేశీ ప్రయాణాలు, అనవసర ఖర్చులు తగ్గించాలంటూ PM మోదీ చేసిన వ్యాఖ్యల్లో భాగంగా బంగారం కొనవద్దని పిలుపిచ్చారు. ఈ ప్రకటన స్వర్ణకార వర్గంలో తీవ్ర ఆందోళన కలిగించింది.

ఆంధ్రప్రదేశ్‌లో దాదాపు 62,000 మంది స్వర్ణకారులు ఉన్నారు. వారితో పాటు పరోక్షంగా సుమారు 8 లక్షల మంది బంగారం తయారీపై ఆధారపడి జీవిస్తున్నారు. దేశవ్యాప్తంగా 40 లక్షల మంది స్వర్ణకారులు, వారి కుటుంబ సభ్యులతో కలిపి సుమారు 2 కోట్ల మంది ఈ వృత్తిపై ఆధారపడ్డారని స్వర్ణకారులు తెలిపారు.

బంగారం ధరలు ఇప్పటికే భారీగా పెరిగాయి. 10 గ్రాముల బంగారం ధర ₹65,000-₹70,000 ఉండాల్సిన చోట ₹1,70,000 వరకు పెరిగిందని స్వర్ణకారులు పేర్కొన్నారు. దీంతో ఇప్పటికే దాదాపు 80% మందికి పని తగ్గిపోయిందని వారు చెప్పారు.

నోట్ల రద్దు, కరోనా లాంటి ముందటి సంక్షోభాల వల్ల కూడా స్వర్ణకార వర్గం తీవ్రంగా దెబ్బతిన్నదని ఆందోళనకారులు తెలిపారు. కేంద్ర నిర్ణయాలకు మద్దతు ఇస్తూనే, తమకు జీవనభద్రత కల్పించాలని కేంద్ర, రాష్ట్ర ప్రభుత్వాలను స్వర్ణకారులు కోరారు.