AP శిల్పారామాల ఆధునికీకరణ: పర్యాటక ఆకర్షణగా కళా గ్రామాలు

ఆంధ్రప్రదేశ్‌లోని శిల్పారామాలను పర్యాటక ఆకర్షణ కేంద్రాలుగా మార్చేందుకు ప్రభుత్వం చర్యలు ప్రారంభించింది. కడప, పుట్టపర్తి, పులివెందల, తిరుపతి, అనంతపురం, విజయనగరం, విశాఖపట్నం, గుంటూరు, కాకినాడ శిల్పారామాల్లో నూతన సౌకర్యాలు కల్పిస్తున్నారు.

పిల్లల ఆటస్థలాలు, సాంస్కృతిక వేదికలు, హస్తకళ ప్రదర్శన కేంద్రాలు, ఫుడ్ కోర్టులతో పాటు ఏడాది పొడవునా సాంస్కృతిక కార్యక్రమాలు నిర్వహించనున్నారు. తిరుపతి శిల్పారామాన్ని అంతర్జాతీయ స్థాయి ఎకో టూరిజం కేంద్రంగా అభివృద్ధి చేయనున్నట్లు అధికారులు తెలిపారు.

ఇప్పటికే లీడ్ లైటింగ్ ఏర్పాటు, ప్రతి వారాంతం కూచిపూడి, భరతనాట్యం ప్రదర్శనలు, సాయంత్రం సంగీతం, హస్తకళల తయారీ షార్ట్ వీడియోల ప్రదర్శన తప్పనిసరి చేశారు. మెటల్ స్క్రాప్ విగ్రహాలు, విలేజ్ మ్యూజియం, ఓపెన్ ఎయిర్ థియేటర్, బోటింగ్ సౌకర్యాలు కూడా అందుబాటులోకి వస్తున్నాయి.

హస్తకళాకారులు నేరుగా కొనుగోలుదారులతో అనుసంధానం కావడంతో మధ్యవర్తుల ప్రమేయం తొలగనుందని అధికారులు చెప్పారు. శిల్పారామాల వెబ్‌సైట్‌ను మొబైల్ ఫ్రెండ్లీగా అప్‌గ్రేడ్ చేస్తున్నారు. తిరుపతిలోని హ్యాండీక్రాఫ్ట్స్ మ్యూజియం మెరుగుపరిచేందుకు రూ.15 లక్షల ప్రతిపాదనను కేంద్రానికి పంపినట్లు సమాచారం.

కొత్తగా శ్రీకాకుళం, రాయచోటీ ప్రాంతాల్లో శిల్పారామాల ఏర్పాటుకు సన్నాహాలు జరుగుతున్నాయి. రాబోయే రెండు నెలల్లో తిరుపతి శిల్పారామంలో గణనీయమైన ప్రగతి కనిపిస్తుందని అధికారులు వెల్లడించారు.