గవర్నర్ కోటా ఎమ్మెల్సీ స్థానాలు: రెండు స్థానాలకు 20 మందికి పైగా టీడీపీ నేతలు పోటీ

ఆంధ్రప్రదేశ్ గవర్నర్ కోటాలో రెండు ఎమ్మెల్సీ స్థానాలు నేటితో ఖాళీ అవుతున్నాయి. శాసనమండలి డిప్యూటీ చైర్మన్ జకియా ఖానమ్, ఎమ్మెల్సీ పండుల రవీంద్రబాబుల పదవీ కాలం ముగుస్తుండడంతో ఈ స్థానాలు ఖాళీ అవుతున్నాయి.

ఈ రెండు స్థానాలకు టీడీపీలో 20 మందికి పైగా నేతలు ఆసక్తి చూపుతున్నారు. ఉమ్మడి కృష్ణా జిల్లా నుంచి వర్ల రామయ్య, దేవినేని ఉమా, వంగవీటి రాధ, టీడీ జనార్ధన్, గొట్టిపాటి రామకృష్ణ, బుద్ధ వెంకన్న వంటి నేతలు పోటీలో ఉన్నారు.

గోదావరి జిల్లాల నుంచి మంతెన సత్యనారాయణ రాజు, క్షత్రియ సామాజిక వర్గానికి చెందిన నేతగా మరోసారి అవకాశం ఆశిస్తున్నారు. రాయలసీమ నుంచి రెడ్డప్పగారి శ్రీనివాస్ రెడ్డి, తిప్పే స్వామి, కడపకు చెందిన బీటెక్ రవి, అనంతపురం మాజీ ఎమ్మెల్యే ప్రభాకర్ చౌదరి తదితరులు ప్రయత్నాలు చేస్తున్నారు.

వికలాంగుల కోటాలో అవకాశం కోసం గ్రంధాలయ కార్పొరేషన్ చైర్మన్ గోనుగుంట్ల కోటేశ్వరరావు, బ్రాహ్మణ కోటాలో ఏవీ రమణ, మాజీ ఎమ్మెల్యే కొమ్మాలపాటి శ్రీధర్, పోతినేని శ్రీనివాసరావు వంటి నేతలు కూడా పేర్లు ప్రముఖంగా వినిపిస్తున్నాయి.

ముఖ్యమంత్రి చంద్రబాబు నాయుడు సామాజిక, ప్రాంతీయ సమీకరణాలను పరిగణలోకి తీసుకుని నేడో రేపో అభ్యర్థులను ప్రకటిస్తారని భావిస్తున్నారు. ప్రస్తుతం అవకాశం దక్కని వారికి భవిష్యత్తులో ఇతర పదవులు ఇస్తామని పార్టీ వర్గాలు సంకేతాలు ఇస్తున్నాయి.