వెల్ఫేర్ హాస్టళ్లు, రెసిడెన్షియల్ స్కూళ్లపై సీఎం చంద్రబాబు హెచ్చరిక

ఆంధ్రప్రదేశ్ సీఎం చంద్రబాబు నాయుడు వెల్ఫేర్ హాస్టళ్లు, రెసిడెన్షియల్ స్కూళ్ల పనితీరుపై అధికారులతో సమీక్షించారు. వెల్ఫేర్ హాస్టళ్లు 4.8 ప్లస్‌గా ఉన్నాయని, రెసిడెన్షియల్ స్కూళ్లు 5.87 మైనస్‌గా ఉన్నాయని ఆయన లెక్కలు చూపించారు.

రెసిడెన్షియల్ స్కూళ్లను గాలికి వదిలేశారా అని ప్రశ్నించారు. వెంటనే పనితీరు మెరుగుపరుచుకోవాలని సూచించారు. బీసీ రెసిడెన్షియల్ స్కూళ్లు కొంత మెరుగ్గా ఉన్నాయని, 1.26 ప్లస్‌గా ఉందని చెప్పారు. హాస్టళ్ల పనితీరు మాత్రం సంతృప్తికరంగా లేదని అన్నారు.

గత రెండేళ్లుగా తాను పరిస్థితిని గమనిస్తున్నానని చంద్రబాబు తెలిపారు. తనకు మూడో కన్ను ఉందని, అధికారులపై నిఘా ఎప్పుడూ ఉంటుందని హెచ్చరించారు. మంచి పని చేసే వారికి అభినందనలు, ప్రమోషన్లు ఉంటాయన్నారు. నిర్లక్ష్యం చేసినా, సూచనలు పాటించకపోయినా చర్యలు తప్పవని స్పష్టం చేశారు.

ఈ విషయంలో తాము చాలా స్పష్టంగా ఉన్నామని, ఇది తమాషా కాదని చంద్రబాబు అన్నారు. సమీక్షలో బీసీ విభాగం అధికారి హాజరుకాలేదని గుర్తించారు. లీవు పెట్టి ఉంటే ఫర్వాలేదని, కారణం లేకుండా గైర్హాజరైతే చర్యలు తీసుకుంటామని హెచ్చరించారు.