ఏపీ ప్రభుత్వం 'నేతన్న సేవలో' పథకం: ఆగస్టు 7 నుంచి నేత కుటుంబాలకు రూ.25,000 సాయం

ఆంధ్రప్రదేశ్ ప్రభుత్వం చేనేత కుటుంబాలకు ఏటా రూ.25,000 సాయం అందించే 'నేతన్న సేవలో' పథకాన్ని ఆగస్టు 7న ప్రారంభించనుంది. ఈ పథకం ప్రస్తుతం సొంత మగ్గాలు కలిగిన నేత కార్మికులకే వర్తిస్తుంది.

రాష్ట్రంలో ఇలాంటి 50,000 మంది నేతన్నలు ఉన్నట్లు ప్రభుత్వం గుర్తించింది. దరఖాస్తు చేసుకునే అవకాశం ఆన్‌లైన్‌లో లేదు. గ్రామ పంచాయతీ లేదా వార్డు సచివాలయంలో ఏర్పాటు చేసిన ప్రత్యేక కౌంటర్లో మాత్రమే అప్లికేషన్ ఇస్తారు. ఆగస్టు 5 దరఖాస్తుకు చివరి తేదీ. అప్లికేషన్తో హ్యాండ్లూమ్ కార్డు, రేషన్ కార్డు, దరఖాస్తుదారుడి పేరిట ఉన్న మగ్గం రిజిస్ట్రేషన్ పత్రాలు సమర్పించాలి.

ఈ పథకంలో ఆర్థిక సాయంతో పాటు విద్యుత్ సబ్సిడీ కూడా ఇస్తారు. ఎలక్ట్రిక్ మగ్గం ఉంటే 500 యూనిట్ల వరకు, లేనివారికి 200 యూనిట్ల ఉచిత విద్యుత్ లభిస్తుంది. రాయితీ రుణాలు, హెల్త్ ఇన్సూరెన్స్ తీసుకొచ్చే యోచన కూడా ప్రభుత్వానికి ఉంది. అయితే మగ్గం సొంతంగా లేని, కూలీగా పనిచేసే సుమారు 15,000-20,000 మంది నేత కళాకారుల దరఖాస్తులను మొదటి విడత తర్వాత పరిశీలిస్తామని ప్రభుత్వం తెలిపింది.

గతంలో వైఎస్సార్సీపీ ప్రభుత్వం 'నేతన్న నేస్తం' పేరుతో రూ.24,000 సాయాన్ని అందించేది. ప్రస్తుత ప్రభుత్వం వచ్చాక ఆ పథకాన్ని నిలిపివేసింది. నేతన్నల డిమాండ్ మేరకు కొత్త పథకం తీసుకొచ్చారు. సొంత మగ్గాలు లేని నేత కార్మికులకు కూడా ఈ సాయం వర్తింపజేయాలని చేనేత సంఘాలు కోరుతున్నాయి. ప్రస్తుతం ఆ దిశగా ప్రభుత్వం ఆలోచించడం లేదు, కేవలం మగ్గం యాజమాన్యంలో ఉన్న నేతన్నలకే ఈ పథకం అమలవుతుంది.