ఏపీ కృష్ణా నీటి వాటా తాగునీటికే: మంత్రి నిమ్మల రామానాయుడు

రాష్ట్రానికి కేటాయించిన కృష్ణా నది నీటిని తాగునీటి అవసరాలకు మాత్రమే వినియోగిస్తామని ఏపీ ఇరిగేషన్ శాఖ మంత్రి నిమ్మల రామానాయుడు తెలిపారు. ఎల్ నినో పరిస్థితులను దృష్టిలో ఉంచుకొని 2027 జూన్ వరకు శ్రీశైలంలో నీటిని భద్రపరచాల్సిన అవసరం ఉందని మంత్రి అన్నారు.

ప్రస్తుతం శ్రీశైలంలో 119 టీఎంసీల నీరు నిల్వ ఉందని, రాబోయే 10 రోజుల్లో మరో 100 టీఎంసీల ఇన్ఫ్లో రావచ్చని ఆయన వివరించారు. ఈ నీటిలో ఏపీకి 63% వాటా లభిస్తుందని, ఆ నీటిని తాగునీటి కోసం విడుదల చేస్తున్నామని తెలిపారు.

భూగర్భ జలాలు అడుగంటిపోయాయని, సగటు వర్షపాతం కంటే 60-70% తక్కువ వర్షం కురిసిందని మంత్రి పేర్కొన్నారు. సెప్టెంబర్-అక్టోబర్ నుండి ఎండలు, వడగాలులు తీవ్రమయ్యే అవకాశం ఉన్నందున తాగునీటికి ప్రాధాన్యత ఇవ్వాలని సీఎం చంద్రబాబు నాయుడు ప్రతి వారం సమీక్ష చేస్తున్నారని చెప్పారు.

ఈ క్రమంలోనే ఈరోజు శ్రీశైలం నుంచి 13 టీఎంసీల నీటిని తాగునీటి రిజర్వాయర్‌కు విడుదల చేసినట్టు మంత్రి వెల్లడించారు. శ్రీశైలంతో పాటు ఇతర ప్రాజెక్టులపై ప్రతివారం సమీక్ష చేస్తామని, పరిస్థితులకు అనుగుణంగా చర్యలు తీసుకుంటామని అన్నారు.