పాడి రైతులకు ఊతంగా 'పశు సంపదే గ్రామ సంపద' కార్యక్రమం

రాష్ట్రంలో పాడి రైతులకు ఊతంగా పశు సంవర్ధక శాఖ "పశు సంపదే గ్రామ సంపద" అనే ప్రత్యేక కార్యక్రమాన్ని ప్రారంభించింది. పశువులు సకాలంలో గర్భం దాల్చకపోవడం వల్ల రాష్ట్రంలో ఏటా రూ.35,000 కోట్ల నష్టం జరుగుతోందని అధికారులు అంచనా వేస్తున్నారు.

రాష్ట్రంలో పిల్లలివ్వగల 51 లక్షల పశువులు ఉన్నాయి. అందులో 60% మాత్రమే సరైన సమయంలో చూరుకడుతున్నాయి. ఈ విధానంలో ఈ ఏడాది చూరుకట్టే శాతాన్ని 20% పెంచడం లక్ష్యం. గ్రామాల్లో సర్వే ఇప్పటికే మొదలైంది. పశు వైద్యులకు ప్రత్యేక శిక్షణ ఇచ్చారు.

కార్యక్రమంలో భాగంగా ప్రతి పశువుకు కేవలం ఇంజెక్షన్లు ఇవ్వడమే కాకుండా పూర్తి స్థాయి ఆరోగ్య తనిఖీ చేస్తారు. పశువుల ఎదకాలం, చూరుకట్టే అంచనా, పాల ఉత్పత్తి వంటి వివరాలను రికార్డుల్లో నమోదు చేస్తారు. ఆడ దూడల శాతం పెంచడానికి ప్రత్యేక వీర్యాన్ని వాడతారు.

సాధారణంగా దేశవాళీ ఆవులు 40-42 నెలల్లో, హైబ్రిడ్ ఆవులు 30-32 నెలల్లో, గేదెలు 40-44 నెలల్లో మొదటి ఈతకు రావాలి. పిల్లలను కన్న తర్వాత ఆవుల్లో 12-13 నెలలు, గేదెల్లో 13-14 నెలలు మధ్య వ్యవధి ఉండాలి. గర్భధారణ ప్రక్రియను 45-65 రోజుల్లో పూర్తి చేయడం ఈ పథకం లక్ష్యం.

రైతులకు ఆర్థిక నష్టం గురించి అవగాహన కల్పించడం, మహిళా సంఘాలు, పాల ఉత్పత్తిదారుల సంఘాలు, స్వచ్ఛంద సంస్థలతో కలిసి ఈ కార్యక్రమాన్ని అమలు చేస్తారు. పాడి పరిశ్రమకు వ్యవసాయంతో సమాన ప్రాధాన్యత ఇవ్వాలని అధికారులు తెలిపారు.