మదనపల్లెలో రూ.1 లక్ష కోట్లతో హార్టికల్చర్ హబ్; 9 లక్షల మందికి ఉపాధి

ఆంధ్రప్రదేశ్ ప్రభుత్వం అన్నమయ్య జిల్లా మదనపల్లెలో రూ.1 లక్ష కోట్ల పెట్టుబడితో అంతర్జాతీయ స్థాయి హార్టికల్చర్ హబ్ ఏర్పాటు చేయబోతోంది. ప్రాజెక్టుకు సంబంధించిన కీలక ఒప్పందాలు ఆగస్టు 3న రిలయన్స్‌తో కుదుర్చుకోనుండగా, ఆగస్టు 15లోగా శంకుస్థాపన జరగనుంది.

ఈ హబ్ లో ఇండియన్ స్కూల్ ఆఫ్ అగ్రికల్చర్ (ISA) ఏర్పాటు చేస్తారు. కృత్రిమ మేధ (AI) ఆధారిత వ్యవసాయం, డిజిటల్ ఫార్మింగ్, ఆహార ప్రాసెసింగ్, తక్కువ నీటి వినియోగ సాంకేతికత, వాతావరణ అనుకూల వ్యవసాయం, గ్లోబల్ మార్కెట్ ఇంటెలిజెన్స్ వంటి రంగాల్లో పరిశోధనలు చేపట్టనున్నారు.

మొత్తం పెట్టుబడిలో రూ.40 వేల కోట్లు ప్రభుత్వం, మిగిలిన రూ.60 వేల కోట్లు ప్రైవేటు భాగస్వామ్యంతో సమకూరనున్నాయి. ప్రత్యక్షంగా, పరోక్షంగా సుమారు 9 లక్షల మందికి ఉపాధి లభిస్తుందని అధికారులు అంచనా వేస్తున్నారు. మదనపల్లె సమీపంలోని పెద్దతిప్ప సముద్రం మండలంలో 500 ఎకరాల ప్రభుత్వ భూమిని గుర్తించగా, భూసేకరణ తుది దశలో ఉంది.

సీఎం చంద్రబాబు నాయుడు ఇటీవల కేంద్ర ఆర్థిక మంత్రి నిర్మల సీతారామన్‌ను కలిసి ప్రాజెక్టుకు కేంద్ర సహకారం కోరారు. ఏపీలో ప్రతి ఏటా 18.25 లక్షల హెక్టార్లలో 360 లక్షల మెట్రిక్ టన్నుల ఉద్యానవన పంటలు పండుతున్నాయి. దేశ ఉద్యానోత్పత్తిలో ఆంధ్రప్రదేశ్ కీలకమైనందున, ఈ హబ్ రాష్ట్ర ఉద్యాన రంగాన్ని జాతీయ స్థాయికి తీసుకెళ్లే లక్ష్యంగా ప్రభుత్వం పేర్కొంది.