ఏపీలో రైతు బజార్లలో బీపీటీ రైస్ ₹52కే విక్రయం: మంత్రి నాదెండ్ల మనోహర్

మంత్రి నాదెండ్ల మనోహర్ రాష్ట్రవ్యాప్తంగా 150 రైతు బజార్లలో బీపీటీ స్టీమ్ రైస్ కిలో ₹52 కి విక్రయించనున్నట్లు ప్రకటించారు. 500 రైస్ మిల్లు అవుట్ లెట్లలో కూడా అదే ధరకు బియ్యం అందించనున్నారు. విజయవాడలో ఈ కార్యక్రమాన్ని ఆయన ప్రారంభించారు.

ఈ బియ్యం గతంలో కిలో ₹64-65 ధరలో లభించేదని, ప్రస్తుతం ధరలు తగ్గించినట్లు మంత్రి తెలిపారు. గల్ఫ్ వార్ ప్రభావంతో కొంతమంది ధరలు పెంచే ప్రయత్నం చేస్తున్నారని, దాన్ని అడ్డుకుంటామన్నారు.

డి-మార్ట్ తరహాలో 'మీ మార్ట్' పేరుతో మినీ మార్ట్లు ఏర్పాటు చేస్తున్నట్లు మనోహర్ చెప్పారు. ఆగస్టు 15 నాటికి 553 మినీ మార్ట్లు తెరవనున్నారు. కేంద్ర నేషనల్ కన్స్యూమర్ కో-ఆపరేటివ్ ఫెడరేషన్ (NCCF) తో ఒప్పందం కుదుర్చుకుని 1000 మినీ మార్ట్ల ఏర్పాటుకు ప్రణాళిక సిద్ధం చేశారు. ఈ మార్ట్లలో 64 నిత్యావసర వస్తువులు తక్కువ ధరలకు లభిస్తాయి.

కృష్ణా, గుంటూరు జిల్లాల్లో ప్రారంభించి ఆ తర్వాత గోదావరి జిల్లాలకు విస్తరించాలని నిర్ణయించారు. కేంద్ర ప్రభుత్వ సహకారంపై మంత్రి ప్రహ్లాద్ జోషి, ప్రధాని నరేంద్ర మోడీకి ధన్యవాదాలు తెలిపారు. రేషన్ మాఫియాను అడ్డుకుంటామని మంత్రి హామీ ఇచ్చారు.