కోర్టు విచారణల్లో వీడియో కాన్ఫరెన్స్ విధానానికి ఏపీ ప్రభుత్వం గజెట్ విడుదల

ఆంధ్రప్రదేశ్ ప్రభుత్వం 'ఆంధ్రప్రదేశ్ ఎలక్ట్రానిక్ కమ్యూనికేషన్ అండ్ వీడియో కాన్ఫరెన్సింగ్ రూల్స్ 2026' పేరుతో గజెట్ నోటిఫికేషన్ జారీ చేసింది. కొత్త నిబంధనల ప్రకారం కోర్టు విచారణలు, సాక్ష్య సేకరణ ఇకపై వీడియో కాన్ఫరెన్స్ ద్వారా జరగనున్నాయి.

ఈ నిబంధనల ద్వారా సాక్షులు నేరుగా కోర్టుకు రాకుండా ఆన్‌లైన్‌లో సాక్ష్యం చెప్పవచ్చు. ఫారెన్సిక్ అధికారులు తమ నివేదికలు, ఆధారాలను వీడియో కాన్ఫరెన్స్ ద్వారా న్యాయమూర్తి ముందు ఉంచే అవకాశం ఉంది. దూర ప్రాంతాల్లోని జైళ్లలో ఉన్న నిందితులకు రిమాండ్ పొడిగింపు, విచారణ కూడా VC ద్వారా నిర్వహిస్తారు.

పోక్సో, మహిళలపై దాడి వంటి సున్నిత కేసుల్లో బాధితులు, సాక్షులు నేరుగా కోర్టు వాతావరణంలోకి రాలేని సందర్భాల్లో వీడియో కాన్ఫరెన్స్ ఎంతో ఉపయోగకరంగా ఉంటుంది. దీనివల్ల వారు మరింత స్వేచ్ఛగా సాక్ష్యం చెప్పగలుగుతారు.

ఈ నిబంధనలు హైకోర్టు, జిల్లా కోర్టులు, సెషన్స్ కోర్టులు, ట్రిబ్యునల్స్, లోక్ అదాలత్‌లతో సహా రాష్ట్రంలోని అన్ని న్యాయ సంస్థలకు వర్తిస్తాయి. ఇన్ కెమెరా విచారణలు కూడా VC ద్వారా జరగవచ్చు. కొన్ని కేసుల విచారణను ప్రజలు వీక్షించే అవకాశం ఉండొచ్చు.

కోవిడ్ సమయంలో హైబ్రిడ్ మోడ్‌లో వీడియో కాన్ఫరెన్సింగ్ ప్రారంభమైనప్పటికీ, ఇప్పుడు పూర్తిస్థాయిలో అమలు చేసేలా నిబంధనలు రూపొందించారు. కేసుల పెండింగ్ తగ్గించడంలో ఇది ఉపయోగపడుతుందని భావిస్తున్నారు.