అవయవ దానం ఆర్డినెన్స్‌పై గూడూరు సీతా మహాలక్ష్మి అభిప్రాయం

ఆంధ్రప్రదేశ్ ప్రభుత్వం తాజాగా జారీ చేసిన అవయవ దానం ఆర్డినెన్స్ (నెంబర్ 51) అంశంపై రాష్ట్ర అవయవ దాతల సంఘం వ్యవస్థాపకురాలు గూడూరు సీతా మహాలక్ష్మి స్పందించారు. ఈ ఆర్డినెన్స్ కొన్ని కీలకమైన మార్పులు తీసుకొచ్చిందని, ముఖ్యంగా లైవ్ డోనేషన్ కోసం రక్త సంబంధీకుల పరిధి విస్తరించడం, అక్రమ కిడ్నీ రాకెట్లపై కఠిన చర్యలు ప్రకటించడం వంటివి ఉన్నాయని ఆమె వివరించారు.

పాత నిబంధనల ప్రకారం భార్య, భర్త, తల్లిదండ్రులు, పిల్లలు మాత్రమే దాతలుగా పరిగణించేవారు. కొత్త ఆర్డినెన్స్‌తో తాత, నానమ్మ, అమ్మమ్మ, మనవడు, మనవరాలు వంటి వారిని కూడా రక్తసంబంధీకులుగా చేర్చారు. దీంతో ఎక్కువ మంది లైవ్ డోనర్లు అందుబాటులోకి రావడంతోపాటు వెయిటింగ్ లిస్ట్ బాగా తగ్గే అవకాశం ఉందని సీతా మహాలక్ష్మి తెలిపారు.

ఇదే సందర్భంగా ఆమె ఆరోగ్య శాఖ మంత్రి సత్యకుమార్ యాదవ్‌కు కృతజ్ఞతలు తెలియజేస్తూ, ప్రభుత్వం తీసుకొచ్చిన కఠిన నిబంధనలు అక్రమాలను అరికట్టడానికి ఉపయోగపడతాయన్నారు. ఆర్డినెన్స్ ప్రకారం కిడ్నీ రాకెట్లకు పాల్పడితే 10 సంవత్సరాల జైలు శిక్ష, కోటి రూపాయల దాకా జరిమానా విధించే అవకాశం ఉంది.

అయితే, అవయవ దానం ఉద్యమాన్ని మరింత ముందుకు తీసుకెళ్లేందుకు ప్రభుత్వం అదనపు చర్యలు తీసుకోవాలని ఆమె డిమాండ్ చేశారు. తాము సమర్పించిన 20 అంశాల్లో కొన్ని: అవయవ దాత కుటుంబానికి అవుట్‌సోర్సింగ్ ఉద్యోగం కల్పించడం, లైవ్ డోనర్లకు 42 రోజుల ప్రత్యేక సెలవు ఇవ్వడం, డ్రైవింగ్ లైసెన్స్, ఆధార్ కార్డులపై ఆర్గాన్ డోనర్ సంకేతం ఉంచడం వంటివి ఉన్నాయి. వీటిని వెంటనే అమలు చేయాలని కోరారు.

యువతలో అవగాహన పెంచడానికి ప్రభుత్వం సెమినార్లు, ర్యాలీలు నిర్వహించాలని సూచించారు. అలాగే కేంద్ర ప్రభుత్వం తీసుకొచ్చిన నోటో (National Organ and Tissue Transplant Organization) వెబ్‌సైట్‌లో ఎక్కువమంది నమోదు చేసుకోవడం సానుకూల పరిణామమని ఆమె పేర్కొన్నారు.