పుంగనూరు గిత్తను రూ.3.70 లక్షలకు కేంద్ర ప్రభుత్వం కొనుగోలు

అంబేద్కర్ కోనసీమ జిల్లా మాచవరం గ్రామానికి చెందిన పుంగనూరు గిత్తను కేంద్ర ప్రభుత్వం రూ.3.70 లక్షలకు కొనుగోలు చేసింది. ఈ గిత్త ఆదిశ్రీ డైరీ ఫార్మ్ యజమాని అడబాల ప్రేమ్ కుమార్‌కు చెందినది.

కేంద్ర ప్రభుత్వ ఆధ్వర్యంలోని నేషనల్ డైరీ డెవలప్మెంట్ బోర్డ్ (NDDB) చెన్నైలోని తన సెమెన్ స్టేషన్ కోసం ఈ గిత్తను ఎంపిక చేసింది. ఈ విషయాన్ని ప్రేమ్ కుమార్ వెల్లడించారు.

గత ఐదేళ్లుగా తమ ఫార్మ్ నుంచి గిత్తను ప్రభుత్వ సెమెన్ బ్యాంకుకు ఇవ్వాలని ప్రయత్నిస్తున్నామని, చివరికి ఈ సారి అది సాధ్యమైందని ఆయన తెలిపారు. ఈ గిత్త ఎత్తు 34 ఇంచులు. దీని తల్లీ, తండ్రీ 100% పుంగనూరు జాతికి చెందినవి. వీర్యం మూడు నెలల్లో రైతులకు అందుబాటులోకి రానుంది.