పోలవరం ప్రాజెక్టుకు భారీ వరద ఇన్‌ఫ్లో; 48 గేట్లు ఎత్తివేత

ఎగువ ప్రాంతాల్లో కురుస్తున్న భారీ వర్షాల కారణంగా గోదావరి నదిలో వరద ప్రవాహం పెరుగుతోంది. ఏలూరు జిల్లా పోలవరం ప్రాజెక్టు వద్ద నీటిమట్టం వేగంగా పెరుగుతోంది.

అధికారులు ప్రాజెక్టు స్పిల్వేలోని 48 గేట్లను పూర్తిగా ఎత్తివేశారు. దీని ద్వారా 5,36,000 క్యూసెక్కుల వరద నీటిని దిగువకు విడుదల చేస్తున్నారు. నీటిమట్టం మరింత పెరిగితే పలు గ్రామాలకు బయటి ప్రపంచంతో సంబంధాలు తెగిపోయే ప్రమాదం ఉందని అధికారులు అంచనా వేస్తున్నారు.

లోతట్టు ప్రాంతాల్లోకి వరద నీరు చేరే అవకాశం ఉంది. జిల్లా యంత్రాంగం ప్రజలను అప్రమత్తంగా ఉండాలని హెచ్చరించింది. లోతట్టు ప్రాంతాల ప్రజలను సురక్షిత ప్రాంతాలు, పునరావాస కేంద్రాలకు తరలిస్తున్నారు.

నదీ పరివాహక ప్రాంత ప్రజలు అప్రమత్తంగా ఉండాలని అధికారులు స్పష్టం చేశారు. మత్స్యకారులు వేటకు వెళ్లవద్దని, ఎవరూ నదిలోకి దిగవద్దని సూచించారు. అధికారులు పరిస్థితిని నిరంతరం సమీక్షిస్తున్నారు.