ఏపీలో ఆరు నెలల్లో 9,194 రోడ్డు ప్రమాదాలు, 4,058 మంది మృతి

ఆంధ్రప్రదేశ్‌లో ఈ ఏడాది మొదటి ఆరు నెలల (జనవరి–జూన్) కాలంలో 9,194 రోడ్డు ప్రమాదాలు జరిగాయి. 4,058 మంది మరణించారని పోలీసు శాఖ గణాంకాలు తెలిపాయి. గత ఏడాది ఇదే సీజన్లో రోజుకు సగటున 23 మరణాలు సంభవిస్తే, ఈ ఏడాది ఆ సంఖ్య 22 కు తగ్గింది.

ద్విచక్ర వాహనదారులు అత్యధికంగా ప్రాణాలు కోల్పోయారు. మొత్తం మృతుల్లో 1,835 (45.2%) ద్విచక్ర వాహనదారులు కాగా, పాదాచారులు 669, కారులో ప్రయాణించేవారు 195, ఆటో ప్రయాణికులు 193 మంది మరణించారు. ద్విచక్ర వాహనాలే 3,980 ప్రమాదాలకు గురయ్యాయి.

అతివేగమే ప్రమాదాలకు ప్రధాన కారణం. 4,178 ప్రమాదాలు వేగ పరిమితిని ఉల్లంఘించడం వల్లే జరిగాయి. ఇందులో 2,643 మంది చనిపోయారు. హెల్మెట్ ధరించని 1,276 మంది ద్విచక్ర వాహనదారులు ప్రమాదాలకు గురికాగా, 746 మంది మరణించారు. సీట్ బెల్ట్ పెట్టుకోని కారు ప్రయాణికులు 93 మంది, రాంగ్ రూట్లో ప్రయాణించిన 103 మంది, మద్యం మత్తులో డ్రైవింగ్ చేసిన 12 మంది, సెల్ఫోన్ మాట్లాడుతూ డ్రైవింగ్ చేసిన ఇద్దరు చనిపోయినట్లు నివేదిక పేర్కొంది.

జిల్లాల్లో తిరుపతి అత్యధిక ప్రమాదాలు–మరణాలు నమోదైన జిల్లా. ఇక్కడ 630 ప్రమాదాల్లో 282 మంది మృతి చెందారు. విశాఖపట్నం, తూర్పుగోదావరి, గుంటూరు, నెల్లూరు తర్వాతి స్థానాల్లో ఉన్నాయి. మృతుల సంఖ్యలో కడప, నెల్లూరు, తూర్పుగోదావరి, విశాఖపట్నం ముందు వరుసలో నిలిచాయి.