ఆగస్టు 1 నుంచి రాష్ట్రవ్యాప్తంగా ప్రత్యేక దుకాణాల్లో తక్కువ ధరకు బియ్యం: ఏపీ ప్రభుత్వం-మిల్లర్ల సంయుక్త నిర్ణయం

ఆంధ్రప్రదేశ్ రైస్ మిల్లర్స్ అసోసియేషన్, రాష్ట్ర ప్రభుత్వంతో కలిసి ఆగస్టు 1 నుంచి రాష్ట్రవ్యాప్తంగా ప్రత్యేక అవుట్లెట్ల ద్వారా నాణ్యమైన బియ్యాన్ని తక్కువ ధరకే అందుబాటులోకి తీసుకురానున్నట్టు ప్రకటించింది. అసోసియేషన్ అధ్యక్షుడు గుమ్మడి వెంకటేశ్వరరావు ఈ విషయాన్ని వెల్లడించారు.

ఈ ప్రత్యేక కార్యక్రమంలో భాగంగా 130 రైతు బజార్లలో బియ్యం విక్రయ కౌంటర్లు ఏర్పాటు చేస్తారు. అదేవిధంగా, 500కు పైగా రైస్ మిల్లుల వద్ద కూడా ప్రజలకు నేరుగా బియ్యం విక్రయించే ఏర్పాట్లు చేపడుతున్నారు.

స్టీమ్ రైస్ కిలో ₹52, రా రైస్ కిలో ₹50 ధరకు విక్రయిస్తారని వెంకటేశ్వరరావు తెలిపారు. మార్కెట్లో బియ్యం ధరలు పెరుగుతున్న నేపథ్యంలో వినియోగదారులపై అదనపు భారం తగ్గించడం, నాణ్యమైన బియ్యాన్ని సరసమైన ధరలో అందించడం ఈ చర్య లక్ష్యమన్నారు.

ప్రభుత్వం-మిల్లర్ల సమన్వయంతో చేపట్టిన ఈ చర్య బియ్యం ధరల నియంత్రణలో కీలక పాత్ర పోషిస్తుందని భావిస్తున్నారు.