తెలుగు రాష్ట్రాలకు ఆరెంజ్ అలర్ట్: నాలుగు రోజుల పాటు భారీ వర్షాలు

దేశవ్యాప్తంగా నైరుతి ఋతుపవనాలు విస్తరిస్తున్న నేపథ్యంలో ఆంధ్రప్రదేశ్, తెలంగాణ రాష్ట్రాలకు వాతావరణ శాఖ ఆరెంజ్ అలర్ట్ జారీ చేసింది. రాబోయే నాలుగు రోజుల పాటు పలు జిల్లాల్లో భారీ వర్షాలు కురిసే అవకాశం ఉంది.

ఆంధ్రప్రదేశ్ విపత్తుల నిర్వహణ సంస్థ ఎండీ ప్రకర్ జైన్ మాట్లాడుతూ, పశ్చిమ గోదావరి, ఏలూరు, ఎన్టీఆర్, కృష్ణా జిల్లాలకు ఆరెంజ్ అలర్ట్ ఇచ్చామన్నారు. నరసాపురం, మచిలీపట్నం, ఏలూరు, గుడివాడ, దివిసీమ, భీమడోలు ప్రాంతాల్లో తీవ్ర స్థాయిలో పిడుగులు పడే ప్రమాదం ఉందని హెచ్చరించారు. ఉరుములు, మెరుపులతో కూడిన మోస్తరు నుంచి భారీ వర్షాలు కురుస్తాయి. కాకినాడ, తూర్పు గోదావరి జిల్లాలకు ఎల్లో అలర్ట్ ప్రకటించారు, ఇక్కడ తేలికపాటి నుంచి మోస్తరు వర్షాలు పడే అవకాశం ఉంది. బాపట్ల, నెల్లూరు జిల్లాలు, రాయలసీమలోని చాలా జిల్లాల్లో చెదురుమదురుగా భారీ వర్షాలు కురిసే అవకాశం ఉన్నట్లు అంచనా.

తెలంగాణలో కూడా రాబోయే నాలుగు రోజుల్లో వర్షాల తీవ్రత పెరగనుంది. వాతావరణ శాఖ అంచనా ప్రకారం, రాష్ట్రంలో గరిష్ట ఉష్ణోగ్రతలు 2 నుంచి 5 డిగ్రీల సెల్సియస్ తగ్గుతాయి. జూన్ 21న ఉత్తరాది జిల్లాలైన ఆదిలాబాద్, కుమరం భీం, ఆసిఫాబాద్, మంచిర్యాల, నిర్మల్ జిల్లాల్లో వడగాలులు కొనసాగినా, రాష్ట్రవ్యాప్తంగా వాతావరణం చల్లబడుతుంది. జూన్ 24, 25 తేదీల్లో ఖమ్మం, నల్గొండ, సూర్యాపేట్, మహబూబాబాద్, వరంగల్, రంగారెడ్డి, హైదరాబాద్, మేడ్చల్ జిల్లాల్లో అక్కడక్కడ భారీ వర్షాలు కురుస్తాయని తెలిపింది.

ఈదురు గాలులు గంటకు 40-50 కిలోమీటర్ల వేగంతో వీచే అవకాశం ఉన్నందున ప్రజలు అప్రమత్తంగా ఉండాలని అధికారులు సూచించారు. భారీ వర్షాలు, ఈదురు గాలుల నేపథ్యంలో ప్రజలు ఇండ్ల నుంచి బయటకు వెళ్లకుండా, చెట్లు, విద్యుత్ స్తంభాల వద్ద నిలబడకుండా జాగ్రత్తలు పాటించాలని తెలిపారు.