ఉపరితల ద్రోణి: తెలుగు రాష్ట్రాల్లో భారీ వర్షాలు; ఐఎండి హెచ్చరిక

తెలుగు రాష్ట్రాలపై ఉపరితల ఆవర్తన ద్రోణి ప్రభావంతో మోస్తరు నుంచి భారీ వర్షాలు కురిసే అవకాశం ఉందని భారత వాతావరణ శాఖ (IMD) హెచ్చరించింది. ఉరుములు, మెరుపులతో కూడిన వర్షాలు కొన్ని ప్రాంతాల్లో పడే అవకాశం ఉందని అధికారులు తెలిపారు. ప్రజలు అప్రమత్తంగా ఉండాలని సూచించారు.

ఇప్పటికే వరుస వర్షాలతో పలు ప్రాంతాల్లో వాగులు, వంకలు పొంగి ప్రవహిస్తున్నాయి. లంక గ్రామాలకు బాహ్య ప్రపంచంతో సంబంధాలు తెగిపోయాయి. ప్రజలు ప్రయాణాలకు పడవలను ఆశ్రయిస్తున్నారు.

కృష్ణా నది నుంచి ప్రాజెక్టులకు భారీగా వరద నీరు వస్తుండడంతో నాగార్జున సాగర్, శ్రీశైలం, తుంగభద్ర, జూరాల, సీలేరు జలాశయాలు నిండుతున్నాయి. హైదరాబాద్ లోని జంట జలాశయాలు కూడా నీటితో నిండిపోయాయి. గోదావరి నదిపై భద్రాచలం వద్ద నీటి మట్టం క్రమంగా తగ్గుతోంది, కానీ దిగువన ధవళేశ్వరం వద్ద వరద నీరు ప్రమాదకర స్థాయిలో ప్రవహిస్తోంది.

అల్లూరి సీతారామరాజు జిల్లాలోని డొంకరాయి, బలిమెల, భూపతిపాలెం, ముసిరిమిల్లి జలాశయాలు కూడా నిండుతున్నాయి. తిరుమలలో ఆకాశగంగ, గోగర్భం రిజర్వాయర్లు నిండడంతో తాగునీటి సమస్య తీరింది.