ఏపీ టెట్ పరీక్షలు నేటి నుంచి ప్రారంభం; అభ్యర్థులకు కీలక సూచనలు

AP TET పరీక్షలు నేటి నుంచి ప్రారంభమవుతున్నాయి. ఈ పరీక్షలను ఆన్లైన్ విధానంలో నిర్వహిస్తున్నారు. రోజుకు రెండు సెషన్లలో పరీక్షలు జరుగుతాయి.

మొదటి సెషన్ ఉదయం 9:30 నుంచి మధ్యాహ్నం 12 వరకు ఉంటుంది. రెండవ సెషన్ మధ్యాహ్నం 2:30 నుంచి సాయంత్రం 5 వరకు కొనసాగుతుంది. అభ్యర్థులు పరీక్ష కేంద్రానికి ఒక గంట ముందే చేరుకోవాలని అధికారులు సూచించారు. ఆలస్యంగా వచ్చే అభ్యర్థులను అనుమతించరు.

హాల్ టికెట్‌పై ఫోటో లేని అభ్యర్థులు ఒరిజినల్ ఆధార్, పాన్ కార్డ్, ఓటర్ కార్డ్ లేదా బ్యాంక్ పాస్‌బుక్ తీసుకెళ్లాలి. పరీక్ష కేంద్రాల్లో మొబైల్ ఫోన్లు, స్మార్ట్ వాచ్లు, బ్లూటూత్ పరికరాలు నిషేధించారు.

పరీక్ష కేంద్రాల్లో కరెంట్, మంచినీరు, పారిశుధ్యం, RTC బస్సు సౌకర్యం, ప్రాథమిక వైద్యం వంటివి సిద్ధం చేయాలని అధికారులు ఆదేశించారు. పోలీస్ భద్రత ఏర్పాటు చేస్తున్నారు. అన్ని శాఖలు సమన్వయంగా పనిచేసి పరీక్షలు ప్రశాంతంగా జరిగేలా చూడాలని సూచించారు.