24 గంటల్లో వాహన రిజిస్ట్రేషన్: AP రవాణా శాఖ కొత్త విధానం అమలు

ఆంధ్రప్రదేశ్ రవాణా శాఖ కొత్త వాహనాలకు 24 గంటల్లోనే శాశ్వత రిజిస్ట్రేషన్ చేసే విధానాన్ని అమలు చేసింది. ఈ మేరకు మూడు రోజుల క్రితం ఒక GO విడుదలైంది.

కొత్త విధానం ప్రకారం, వాహనం కొన్న డీలర్ వద్దే అన్ని పత్రాలు వాహన పోర్టల్‌లో అప్లోడ్ చేయాలి. 24 గంటల్లో రవాణా శాఖ అధికారులు ఆమోదించాలి. అభ్యంతరాలు ఉంటే లిఖితపూర్వకంగా తెలియజేయాలి. లేకపోతే 24 గంటల తర్వాత రిజిస్ట్రేషన్ ఆమోదించినట్లు పరిగణిస్తారు.

ఇప్పటివరకు వాహనదారులు తాత్కాలిక రిజిస్ట్రేషన్ తర్వాత 30 రోజుల్లోపు RTO కార్యాలయాల చుట్టూ తిరగాల్సి వచ్చేది. జాప్యంపై ఫిర్యాదులు వెల్లువెత్తడంతో ప్రభుత్వం ఈ కొత్త విధానాన్ని తీసుకొచ్చింది.

NTR జిల్లాలో సుమారు 200 వాహన డీలర్లు ఉన్నారు. రోజుకు 200 వాహనాల రిజిస్ట్రేషన్ జరుగుతుంది. ఈ విధానం NTR జిల్లాలో అమలు మొదలైంది. అయితే వాహన పోర్టల్‌లో సాంకేతిక మార్పులు చేస్తుండటం వల్ల server సమస్యలు తలెత్తాయి. ప్రస్తుతం 300కు పైగా రిజిస్ట్రేషన్లు pending లో ఉన్నాయి.

సాంకేతిక సమస్యలు పరిష్కారమైన తర్వాత వాహనదారులు రిజిస్ట్రేషన్ certificate డౌన్‌లోడ్ చేసుకోవచ్చు. రవాణా శాఖ server సమస్యలు తొలగించే పనిలో ఉంది.