AP మహిళా హోం గార్డ్ సస్పెన్షన్: అధికారులపై వేధింపు ఆరోపణ; SP కార్యాలయం ఖండన

కృష్ణా జిల్లాలో మహిళా హోమ్ గార్డ్ సస్పెన్షన్ వివాదంలో కొత్త మలుపు చోటుచేసుకుంది. హోమ్ గార్డ్ రూపకళ తనపై వేధింపుల ఆరోపణలు చేస్తోంది. ఆమె విధులకు హాజరైనప్పటికీ అధికారులు తనకు వ్యక్తిగత పనులు చేయాలని డిమాండ్ చేశారని, సస్పెండ్ చేయడం అన్యాయమని చెప్తోంది. మరోవైపు, ఎస్పీ కార్యాలయం ఈ ఆరోపణలను ఖండించింది. హోమ్ గార్డ్‌కు సి-కేటగిరీ విధులు అప్పగించామని, అందులో సానిటైజేషన్, గార్డెనింగ్, టైలరింగ్ వంటి పనులు ఉంటాయని స్పష్టం చేసింది. నిబంధనల ప్రకారమే సస్పెన్షన్ జరిగిందని, విభాగాధిపతి ఆదేశాలతో మూడవ తేదీన సస్పెన్షన్ విధించామని ఎస్పీ కార్యాలయం తెలిపింది.

రూపకళ మాట్లాడుతూ, తాను గన్నవరం డివిజన్ పెనమలూరు పోలీస్ స్టేషన్‌లో నాలుగేళ్లుగా హోమ్ గార్డ్‌గా పనిచేస్తున్నానని, భర్త మరణించాక ఈ ఉద్యోగం వచ్చిందని చెప్పింది. అధికారులు డబ్బులు ఇస్తే పనులు అవుతాయని సూచించారని, తాను డబ్బులు ఇవ్వలేకపోవడంతో కక్ష సాధించారని ఆమె ఆరోపించింది. ఎస్పీని కలిసి తన పరిస్థితి చెప్పుకోగా, ఆయన తనను అవమానించి, నిబంధనల ప్రకారం పనులు చేయాలని కటువుగా సమాధానం ఇచ్చారని ఆమె తెలిపింది. సి-కేటగిరీ కింద విధులు స్టేషన్లో కాకుండా అధికారుల ఇళ్లల్లో పని చేయించడం సరికాదని, ఆరోగ్యం కూడా బాగోలేదని ఆవేదన వ్యక్తం చేసింది.

ఈ కేసుపై పోలీసు అధికారుల స్పందన కోసం ప్రయత్నిస్తున్నాము. ప్రస్తుతం రూపకళ న్యాయం కోసం చట్టపరమైన చర్యలు తీసుకోవాలనుకుంటున్నట్లు సమాచారం.