ఏపీఆర్టీసీ ఒకేసారి 100 EV బస్సులు ప్రారంభం.. నెల్లూరు డిపోకు చేరిక

ఆంధ్రప్రదేశ్ రాష్ట్ర రోడ్డు రవాణా సంస్థ (APSRTC) ఒకేసారి 100 ఎలక్ట్రిక్ బస్సులను ప్రారంభించనుంది. ఈ EV బస్సులు నెల్లూరు రెండో డిపోకు చేరుకున్నాయి.

కడప, ఒంగోలు, తిరుపతి, రాపూర్, ఉదయగిరి, ఆత్మకూరు, గూడూరు ప్రాంతాల్లో ఈ సర్వీసులు నడవనున్నాయి. ఈ బస్సుల్లోనూ మహిళలకు ఉచిత ప్రయాణం కొనసాగుతుందని ఆర్టీసీ ప్రకటించింది. ఇప్పటివరకు పల్లెవెలుగు, అల్ట్రా మెట్రో ఎక్స్‌ప్రెస్ బస్సులకే ఉచిత ప్రయాణ సౌకర్యం ఉండేది.

కొత్త బస్సుల ఛార్జింగ్, సర్వీస్, రిపేర్, మెయింటెనెన్స్‌పై సిబ్బందికి దాదాపు 18 రోజుల నుంచి శిక్షణ ఇస్తున్నారు.

ఉచిత బస్సు ప్రయాణ పథకం ఆగస్టు 15న ప్రారంభమైంది. దీని తర్వాత ప్రయాణికుల సంఖ్య పెరిగింది. ఈ పథకం ద్వారా ఆర్టీసీ ఖజానాకు ₹100 కోట్లు చేరాయని, 100 కోట్ల ప్రయాణాలతో రికార్డు నమోదైందని సమాచారం. అయితే ఉచిత ప్రయాణాలు ప్రారంభించిన తర్వాత బస్సుల సంఖ్య తగ్గిందని ప్రతిపక్ష వర్గాలు, ప్రయాణికులు విమర్శించారు. రద్దీ ఉన్న రూట్లలో బస్సులు వేయడం లేదని వారి ఆరోపణ.

రాష్ట్రంలో 11,500కు పైగా బస్సులు ఉన్నాయి. అయితే దాదాపు 15 ఏళ్లు నడిచిన 1,500 బస్సులను ఉచిత ప్రయాణ పథకానికి ముందే ప్రభుత్వం స్క్రాప్ చేసింది. ప్రయాణికుల భద్రత, పొల్యూషన్ నియంత్రణ కోసం ఈ నిర్ణయం తీసుకున్నట్టు తెలుస్తోంది. పాత బస్సుల స్థానంలో కొత్త EV బస్సులు తీసుకురావాలని ఆర్టీసీ నిర్ణయించింది.

EV బస్సుల నిర్వహణలో ప్రైవేట్ వ్యక్తులను నియమించడంపై ఉద్యోగుల్లో ఆందోళన ఉంది. డ్రైవింగ్, టికెట్ ఇవ్వడం, రిపేర్, సీట్ క్లీనింగ్ వంటి పనులు ప్రైవేట్ వర్గాలకు అప్పగిస్తున్నారు. సాధారణ బస్సు నడవడానికి తొమ్మిది డిపార్ట్‌మెంట్లు పనిచేస్తే, EV బస్సులో నాలుగు డిపార్ట్‌మెంట్లకే పరిమితమైంది. ఇది ఆర్టీసీ ప్రైవేటీకరణ వైపు అడుగు అని ఉద్యోగులు భావిస్తున్నారు. ఉన్న డ్రైవర్లకు శిక్షణ ఇవ్వాలని వారు కోరుతున్నారు.

ఈ అంశంపై ప్రభుత్వం ఇంతవరకు స్పందించలేదు. 100 బస్సుల సర్వీసులు ఎప్పుడు ప్రారంభమవుతాయనే దానిపై అధికారిక ప్రకటన రావాల్సి ఉంది.