గుంటూరు, పల్నాడు, బాపట్లలో మున్సిపల్ నామినేషన్లు ప్రారంభం; YCP నేత హౌస్ అరెస్ట్

గుంటూరు, పల్నాడు, బాపట్ల జిల్లాల్లో రెండో దఫా మున్సిపల్ ఎన్నికల నామినేషన్ల ప్రక్రియ ప్రారంభమైంది. తొలి రోజే నరసరావుపేటలో YCP ఇన్‌చార్జ్ గోపిరెడ్డి శ్రీనివాస్ రెడ్డిని పోలీసులు హౌస్ అరెస్ట్ చేశారు.

నామినేషన్ల ప్రక్రియ ప్రశాంతంగా జరిగేలా ముందస్తు జాగ్రత్తల్లో భాగంగా ఈ చర్య తీసుకున్నట్టు పోలీసులు చెబుతున్నారు. ఎలాంటి అవాంఛనీయ ఘటనలు జరగకుండా ఉండేందుకే హౌస్ అరెస్ట్ చేశామని వారు తెలిపారు. అయితే అధికార పార్టీ నేతలకు పోలీసులు సహకరిస్తున్నారని, తమ నాయకులను హౌస్ అరెస్ట్ చేయిస్తున్నారని YCP నేతలు ఆరోపించారు.

రెండో దఫాలో మంగళగిరి-తాడేపల్లి కార్పొరేషన్‌తో పాటు నరసరావుపేట, పొన్నూరు, బాపట్ల మునిసిపాలిటీలకు ఎన్నికలు జరగనున్నాయి. మంగళగిరి, తాడేపల్లిని కలిపి తొలిసారిగా కార్పొరేషన్‌గా ఏర్పాటు చేశారు. ఇందులో మొత్తం 62 వార్డులు ఉన్నాయి. మంగళగిరి నుంచి మంత్రి లోకేష్ ప్రాతినిధ్యం వహిస్తున్నారు. ప్రతిపక్ష నేత జగన్, డిప్యూటీ CM పవన్ కల్యాణ్ కూడా ఈ కార్పొరేషన్ పరిధిలో ఉండటంతో ఈ ఎన్నికకు ప్రాధాన్యం ఏర్పడింది. మేయర్ పీఠం కోసం TDP, YCP రెండూ కసరత్తు చేస్తున్నాయి.

పల్నాడు జిల్లా కేంద్రం నరసరావుపేట మునిసిపాలిటీ అన్‌రిజర్వ్‌డ్ కేటగిరీలో ఉంది. ఇక్కడ 48 వార్డులు ఉన్నాయి. బాపట్ల మునిసిపాలిటీలో 44 వార్డులు ఉన్నాయి. బాపట్ల మునిసిపాలిటీని BJPకి కేటాయించారు. AP BJP చీఫ్ మాధవ్ బాపట్లలో పార్టీ నేతలతో సమావేశం నిర్వహిస్తున్నారు. ఈ సమావేశంలో చైర్మన్, కౌన్సిలర్ అభ్యర్థులను ప్రకటించే అవకాశం ఉంది.

పొన్నూరు మునిసిపాలిటీ జనరల్ మహిళకు కేటాయించారు. TDP అభ్యర్థిపై స్పష్టత వచ్చింది. YCP సమన్వయకర్త అంబటి మురళి ఈరోజు సమావేశం ఏర్పాటు చేశారు. ఇందులో చైర్మన్ అభ్యర్థిని ప్రకటిస్తారు. ముస్లిం మహిళను చైర్మన్ అభ్యర్థిగా ప్రకటించే అవకాశం ఉంది. బాపట్ల మండల పరిషత్‌లో మెజారిటీ MPTC స్థానాలను YCP గెలుచుకుంది.