APS RTC ఉద్యోగులు ఎలక్ట్రిక్ బస్సుల ప్రైవేటీకరణను వ్యతిరేకిస్తున్నారు

ఏపీఎస్ఆర్టీసీ ఎలక్ట్రిక్ బస్సుల నిర్వహణను ప్రైవేట్ ఆపరేటర్లకు అప్పగించడాన్ని ఉద్యోగులు తీవ్రంగా వ్యతిరేకిస్తున్నారు. ఈ బస్సులను ఆర్టీసీ సొంతంగా నడపాలని, లేదా ప్రభుత్వ సహకారంతో కొనుగోలు చేయాలని డిమాండ్ చేస్తున్నారు.

పీఆర్సీ డీఏ బకాయిలు, స్త్రీ శక్తి ఉచిత ప్రయాణ పథకం అమలులో ఇబ్బందులు, రిక్రూట్మెంట్ లేమి వంటి అంశాలను కూడా ఉద్యోగులు లేవనెత్తారు. ఈ డిమాండ్లపై చర్చించేందుకు ప్రభుత్వం జెఏసీతో చర్చలకు సిద్ధమైంది.

అయితే రవాణా శాఖ స్పెషల్ చీఫ్ సెక్రటరీ అందుబాటులో లేకపోవడంతో నిన్నటి సమావేశం వాయిదా పడింది. ఈ నెల 6వ తేదీన మళ్లీ సమావేశం నిర్వహించనున్నారు.

ప్రైవేటీకరణ జరిగితే కండక్టర్ తర్వాత ఆర్టీసీ ఉద్యోగుల ప్రమేయం ఉండదని జెఏసీ వాదిస్తోంది. గత పదేళ్లుగా రిక్రూట్మెంట్ జరగకపోవడం కూడా ప్రైవేటీకరణకు అనుకూలంగా మారుతుందని చెబుతున్నారు.

ఆర్టీసీ మాత్రం ఎలక్ట్రిక్ బస్సులను గ్రాస్ కాస్ట్ కాంట్రాక్ట్ (వెట్ లీజ్) మోడల్‌లో తీసుకుంటున్నట్లు వివరించింది. ప్రైవేట్ ఆపరేటర్ బస్సుతో పాటు నిర్వహణ, డ్రైవర్‌ను సమకూరుస్తాడు. దీనివల్ల 1,000 బస్సులకు అవసరమైన 2,200 మంది సిబ్బంది కొరత తీరుతుందని అధికారులు చెప్పారు.

ఇప్పటికే నాలుగు బస్ స్టేషన్లలో చార్జింగ్ పాయింట్లు ఏర్పాటైయ్యాయి. ఆగస్టు నాటికి అన్ని బస్ స్టేషన్లలో చార్జింగ్ సౌకర్యాలు, సబ్‌స్టేషన్లు సిద్ధం చేయాలనే లక్ష్యంతో పనులు జరుగుతున్నాయి.

ప్రైవేట్ నిర్వహణపై ఉద్యోగులు ఆందోళన కొనసాగిస్తారని, కేంద్ర విధానాలకు వ్యతిరేకంగా కూడా ఉద్యమిస్తామని హెచ్చరించారు. 6వ తేదీ సమావేశంలో అధికారులు ఎలాంటి నిర్ణయం తీసుకుంటారనేది ఆసక్తికరంగా మారింది.