APSRTC: కొత్త బస్సులు కొనలేని పరిస్థితి — ప్రైవేట్ ఆపరేటర్ల భాగస్వామ్యంపై వివాదం

APSRTC లో 15 లక్షల కిలోమీటర్లు తిరిగిన పాత బస్సులను స్క్రాప్ చేయాల్సిన పరిస్థితి ఏర్పడింది. వాటి స్థానంలో దాదాపు 10,000 కొత్త బస్సులు అవసరం. ఇందుకు అంచనా వేసిన ఖర్చు సుమారు ₹15,000 కోట్లు.

ఈ మొత్తం ఖర్చు భరించే స్థితిలో ప్రభుత్వం లేదని సంకేతాలు వస్తున్నాయి. దీంతో ప్రైవేట్ భాగస్వామ్యం (PPP మోడల్) ద్వారా electric బస్సులు నడపాలని ప్రభుత్వం ఆలోచిస్తోంది. కేంద్రం ద్వారా 750 electric బస్సులు తీసుకొస్తామని CM చంద్రబాబు నాయుడు ప్రకటించారు.

ఈ నిర్ణయాన్ని APSRTC కార్మికులు వ్యతిరేకిస్తున్నారు. ప్రైవేట్ ఆపరేటర్లకు బస్సులు అప్పగిస్తే — సర్వీసులు నడిచినా నడవకపోయినా — కిలోమీటర్ వారీగా చెల్లింపులు తప్పవని కార్మికులు పేర్కొంటున్నారు. దీనివల్ల సంస్థపై అప్పుల భారం పెరుగుతుందని వారు ఆందోళన వ్యక్తం చేస్తున్నారు.

బడ్జెట్‌లో నిధులు కేటాయిస్తే APSRTC సొంతంగా బస్సులు కొని నడపగలదని, తద్వారా ప్రభుత్వానికి ఆదాయం వస్తుందని కార్మికులు వాదిస్తున్నారు. Retro fitting పేరిట పాత బస్సుల బాడీలు, ఇంజిన్లు మార్చే ప్రయత్నం జరుగుతోందని, అది తాత్కాలిక పరిష్కారం మాత్రమేనని కూడా వారు చెప్తున్నారు.

2013 నుంచి APSRTC లో నియామకాలు లేవు. త్వరలో 10,000 మందికి పైగా రిటైర్ అవుతున్నారు. వెంటనే recruitment జరగకపోతే సంస్థ సంక్షోభంలో పడే అవకాశం ఉందని కార్మిక వర్గాలు హెచ్చరిస్తున్నాయి.

మాజీ మంత్రి పేర్ని నాని మాట్లాడుతూ ప్రభుత్వం APSRTC ని అమ్మకానికి పెట్టిందని ఆరోపించారు. స్త్రీ శక్తి పథకం వల్ల ఆర్టీసి ఇబ్బందుల్లో పడిందని చెప్పడం మహిళలపై నెపం వేయడమేనని అన్నారు. ఈ వ్యాఖ్యలను అధికార పక్ష నేత కొనకళ్ళ నారాయణ ఖండించారు. స్త్రీ శక్తి పథకం వల్ల బస్సుల occupancy ratio పెరిగిందని, YSRCP దుష్ప్రచారం చేస్తోందని ఆయన అన్నారు.

ఆర్టీసి కి స్త్రీ శక్తి పథకం బిల్లుల చెల్లింపులో ప్రభుత్వం జాప్యం చేస్తోందనే ఆరోపణలు కూడా వినిపిస్తున్నాయి. ఈ విషయంపై ప్రభుత్వం అధికారిక స్పందన తెలియాల్సి ఉంది.