ఆక్వా ఫీడ్ ధరలు మళ్లీ పెంపు: టైగర్ రొయ్యల మేతకు రూ.10, బనామీకి రూ.12 పెరుగుదల

ఆక్వా ఫీడ్ కంపెనీలు మరోసారి ధరలు పెంచాయి. టైగర్ రొయ్యల మేత ధర కిలోకు రూ.10, బనామి రొయ్యల ఫీడ్ కిలోకు రూ.12 పెంచారు. ఈ కొత్త ధరలు నేటి నుంచే అమల్లోకి వచ్చాయి.

చాలా కాలంగా ఫీడ్ ధరలు తగ్గించాలని ఆక్వా రైతులు డిమాండ్ చేస్తున్నారు. కంపెనీలతో చర్చలు జరుపుతున్న సమయంలోనే ఏకపక్షంగా ధరలు పెంచడంపై రైతులు ఆగ్రహం వ్యక్తం చేస్తున్నారు. రొయ్యల ఉత్పత్తి ఖర్చు పెరగడంతో తీవ్ర నష్టాలు వస్తున్నాయని, అమ్మకపు ధరలు సరిపోవడం లేదని రైతులు చెబుతున్నారు.

ఈ నేపథ్యంలో భీమవరం సమీపంలోని పాలకొల్లులో ఈ రోజు ఆక్వా రైతులు అత్యవసర సమావేశం నిర్వహిస్తున్నారు. ఫీడ్ ధరలు తగ్గించకపోతే క్రాప్ హాలిడే ప్రకటించాల్సి వస్తుందని, ఇక ఆక్వా సాగు చేయలేమని రైతులు హెచ్చరిస్తున్నారు.