కొత్తగూడెంలో ఏఆర్ కానిస్టేబుల్ భార్య హత్య: గోదావరిలో మృతదేహం కోసం గాలింపు

భద్రాద్రి కొత్తగూడెం జిల్లాలో ఏఆర్ కానిస్టేబుల్ తన భార్యను హత్య చేసిన ఘటన ఆలస్యంగా వెలుగులోకి వచ్చింది. టేకులపల్లి మండలానికి చెందిన నరేంద్ర ఏఆర్ విభాగంలో కానిస్టేబుల్‌గా విధులు నిర్వహిస్తున్నాడు. ఈ కేసులో అతను కొత్తగూడెం త్రీ టౌన్ పోలీసుల ఎదుట లొంగిపోయాడు.

పోలీసుల కథనం ప్రకారం, సోషల్ మీడియాలో పరిచయమైన భవానిని నరేంద్ర రెండేళ్ల క్రితం పెళ్లి చేసుకున్నాడు. వీరిద్దరూ కొత్తగూడెం త్రీ టౌన్ పరిధిలో కాపురం చేస్తున్నారు. ఎనిమిది నెలల క్రితం భవానికి పుట్టిన శిశువు మరణించింది.

రెండు రోజుల క్రితం నరేంద్ర భవానిని హత్య చేసినట్లు పోలీసులు తెలిపారు. మృతదేహాన్ని సంచిలో పెట్టి భద్రాచలం వద్ద గోదావరిలో పడేసినట్లు అతనే పోలీసులకు చెప్పినట్లు సమాచారం. పెళ్లి నుంచి తనను వేధిస్తున్నాడని భవాని కుటుంబ సభ్యులు ఆరోపిస్తున్నారు. హత్య సమయంలో భవాని గర్భవతిగా ఉందని నరేంద్ర తెలిపినట్లు సమాచారం.

భవాని మూడు రోజులుగా కనిపించడం లేదని ఆమె తల్లిదండ్రులు ఫిర్యాదు ఇచ్చారు. ఆ మేరకు పోలీసులు కేసు నమోదు చేసి దర్యాప్తు చేపట్టారు. నరేంద్ర ప్రస్తుతం పోలీసు కస్టడీలో ఉన్నాడు. భద్రాచలం గోదావరి పరివాహక ప్రాంతాల్లో మృతదేహం కోసం గాలింపు చర్యలు కొనసాగుతున్నాయి. ఈ ఘటనపై కఠిన చర్యలు తీసుకోవాలని మహిళా సంఘాలు డిమాండ్ చేస్తున్నాయి.