చైనా, రెడీమేడ్ ప్రమిదల పోటీ.. ఆరేపల్లి కుమ్మరుల ఉపాధిపై ఒత్తిడి

కరీంనగర్ శివార్లలోని ఆరేపల్లి గ్రామం మట్టి ప్రమిదల తయారీకి ప్రసిద్ధి. దీపావళి సీజన్ రాగానే ఇక్కడి కుమ్మరి కుటుంబాలు లక్షలాది ప్రమిదల తయారీలో బిజీ అవుతాయి.

తరతరాలుగా వస్తున్న కుమ్మరి వృత్తిని ఇక్కడి కుటుంబాలు నమ్ముకుని జీవనం సాగిస్తున్నాయి. దీపావళికి నెల రోజుల ముందే గ్రామంలో సందడి మొదలవుతుంది. రాత్రింబవళ్లు శ్రమించి చిన్న ప్రమిదల నుంచి పెద్ద ప్రమిదల వరకు తయారు చేస్తారు. సాదా డిజైన్ల నుంచి ఆకర్షణీయమైన రూపాల వరకు ఇక్కడే తయారవుతాయి. ఎలాంటి కెమికల్స్ లేకుండా సహజ మట్టితో ప్రమిదలు చేయడం వీరి ప్రత్యేకత.

వ్యాపారులు నేరుగా గ్రామానికి వచ్చి లారీల కొద్దీ ప్రమిదలు కొంటారు. వాటిని హైదరాబాద్, వరంగల్, నిజామాబాద్ సహా తెలంగాణలోని అన్ని ప్రాంతాలకు తరలిస్తారు.

గత కొన్నేళ్లుగా చైనా, మహారాష్ట్ర నుంచి వచ్చే రంగురంగుల రెడీమేడ్ ప్రమిదలు మార్కెట్‌లో పోటీ పెంచాయి. దీంతో ఆరేపల్లి కుమ్మరుల ఉపాధిపై ప్రభావం పడుతోంది.

ఆరేపల్లికి చెందిన ఓ కుమ్మరి మాట్లాడుతూ, తాను 30 ఏళ్ల నుంచి ప్రమిదలు తయారు చేస్తున్నానని తెలిపారు. ముందు మంచి అమ్మకాలు ఉండేవని ఆయన అన్నారు. ఇప్పుడు నీటిలో వేస్తే వెలిగే ప్లాస్టిక్ ప్రమిదలు, ఇతర రాష్ట్రాల డిజైన్ ప్రమిదలు ఎక్కువగా అమ్ముడవడంతో తమ ప్రమిదలకు ధర దొరకడం లేదని చెప్పారు. గతంలో గ్రామంలో 30 కుటుంబాలు ఈ పని చేసేవని ఆయన తెలిపారు. ఒక్కో ఇల్లు దీపావళికి దాదాపు 50,000 ప్రమిదలు, రెండు నెలల ముందు నుంచే తయారు చేసేవని అన్నారు. ఇప్పుడు ఆ ఆర్డర్లు పూర్తిగా తగ్గిపోయాయని ఆయన చెప్పారు.

మట్టి ప్రమిదలు పర్యావరణానికి అనుకూలమని, వాటిలో కెమికల్స్ ఉండవని కుమ్మరులు చెప్తున్నారు. స్థానిక కళాకారులకు ఉపాధి కల్పించేందుకు ఈ దీపావళికి మట్టి ప్రమిదలను ఆదరించాలని వారు కోరుతున్నారు.