జమ్మూ కాశ్మీర్ లో ఆర్మీ-పోలీసుల మధ్య ఘర్షణ: 40 మంది జవాన్లపై హత్యాయత్నం కేసు

జమ్మూ కాశ్మీర్ లోని కిష్వాల్ జిల్లాలో అతోలి పోలీస్ స్టేషన్ పై దాడి చేసిన ఆరోపణలపై 40 మంది ఆర్మీ జవాన్లతో పాటు ఒక కల్నల్, ఒక మేజర్ లపై పోలీసులు కేసు నమోదు చేశారు.

పోలీసులు నమోదు చేసిన ఎఫ్ఐఆర్ ప్రకారం, 17 రాష్ట్రీయ రైఫిల్స్‌కు చెందిన కల్నల్ ఎన్ అరుణ్ గాంధీ, మేజర్ వికాస్ శర్మలతో పాటు 40 మంది జవాన్లు పోలీస్ స్టేషన్‌పై దాడి చేశారు. వారు లాటీలు, ఇనుప రాడ్లు వంటి ఆయుధాలతో వచ్చి, ఎస్డిపీఓ విజయ్ కుమార్ భగత్, ఎస్హెచ్ఓ అమృత్ కటోచ్‌లతో పాటు ఇతర పోలీసులపై దాడి చేశారని ఆరోపిస్తున్నారు. ఈ దాడిలో పోలీస్ స్టేషన్ లోని ప్రభుత్వ ఆస్తులు, రికార్డులు కూడా ధ్వంసం అయ్యాయని ఎఫ్ఐఆర్ పేర్కొంది.

ఈ ఘర్షణకు తక్షణ కారణం ఒక ఆర్మీ వాహనాన్ని రవాణా శాఖ సీజ్ చేయడం. ఆర్మీ వాహనాన్ని స్వాధీనం చేసుకోవడంతో వివాదం మొదలై, అది చివరకు పోలీస్ స్టేషన్ పై దాడికి దారితీసింది.

ఈ సంఘటనపై భారత సైన్యం స్పందించింది. ఈ అవాంఛనీయ ఘటనపై ఆందోళన వ్యక్తం చేసిన సైన్యం, చట్టాన్ని గౌరవిస్తామని, పోలీసుల విచారణకు పూర్తి సహకారం అందిస్తామని తెలిపింది. దోషులపై నిబంధనల ప్రకారం చర్యలు తీసుకుంటామని కూడా తెలిపింది.