చైనా తీరంలో టైఫాన్ డాల్ఫిన్: 3.9 లక్షల మంది తరలింపు, 1,300 విమానాలు రద్దు

చైనాలో టైఫాన్ డాల్ఫిన్ తుఫాను ఆదివారం తీరాన్ని తాకింది. ఈ తుఫాను ప్రభావం వల్ల బేజియాంగ్ ప్రావిన్స్ అల్లకల్లోలంగా మారింది. గంటకు 162 కిలోమీటర్ల వేగంతో బలమైన గాలులు వీస్తున్నాయి.

తుఫాను వల్ల 3 లక్షల 90 వేల మందిని సురక్షిత ప్రాంతాలకు తరలించారు. శాంఘాయ్ లోని హాంగ్‌కియావో, పుడాంగ్ విమానాశ్రయాల్లో 1,300 పైగా విమానాలను అధికారులు రద్దు చేశారు. ఆదివారం షెడ్యూల్ అయిన విమానాల్లో 60 శాతం రద్దయ్యాయని శాంఘాయ్ ప్రభుత్వ మీడియా తెలిపింది. తీర ప్రాంత ప్రజలను సురక్షిత ప్రాంతాలకు తరలించే కార్యక్రమాన్ని వేగవంతం చేయాలని చైనా ప్రభుత్వం ఆదేశించింది.

2026 సంవత్సరంలో ఇది 13వ తుఫాను. బేజియాంగ్-ఫుజియాన్ తీరం మధ్య ఇది తాకుతుందని అధికారులు అంచనా వేశారు. తీరం దాటిన తర్వాత నెమ్మదిగా కదిలే అవకాశం ఉన్నందున భారీ వర్షాలు కురిసే అవకాశం ఉంది. కొన్ని ప్రాంతాల్లో 200 నుంచి 400 మిల్లీమీటర్ల వరకు వర్షపాతం నమోదు కావచ్చని నిపుణులు హెచ్చరించారు. బేజియాంగ్ లో కొండ చరియలు విరిగిపడే ప్రమాదం కూడా ఉంది.

తుఫాను ఎదుర్కోవడానికి చైనా ప్రభుత్వం డిజిటల్ ట్విన్ ప్లాట్‌ఫామ్ ను ఉపయోగిస్తోంది. ఈ ప్లాట్‌ఫామ్ ఖాళీ చేయాల్సిన ప్రాంతాలు, తరలించాల్సిన వారి సంఖ్యను అంచనా వేస్తుంది. నీటి ఆధారిత కార్యకలాపాలన్నింటినీ నిలిపివేశారు. తైవాన్ లో కూడా భారీ వర్షాలు కురిశాయి, దీంతో కొన్ని విమాన సర్వీసులు రద్దు అయ్యాయి.